Հովիկ Աբրահամյանը հայտնվեց ծուղակում

2014թ.-ին, երբ ՀՀ նախագահի հրամանով Ֆինանսների նախարարությանը միացավ Պետական եկամուտների կոմիտեին, այս միաձուլումը տարաբնույթ քննարկումների տեղիք տվեց, ձևավորվեց մի կառույց, որտեղ միավորվեցին երկրի ֆինանսական հոսքերի կառավարումը, հարկային քաղաքականությունը, մաքսային գործառույթները:

Դա երկու տարի առաջ էր, և տնտեսագետները կարծիք էին հայտնում, որ ֆինանսների սղության պատճառով, հնարավոր է հարկային բեռը ծանրանա, ինչն այդպես էլ եղավ: Այս տարիներին հարկային ծանրաբեռնվածության պատճառով փակվեցին մեծ ու փոքր ընկերություններ: Վերջին երկու տարում փակվել է գրեթե 10-12 հազար ձեռնարկություն, իսկ մաքսային ծառայությունը առավել կամայական էր վարվում ներկրվող ապրանքների հետ` բաժանելով ազդեցիկ ներկրողներին և քաղաքացիներին:

2014-16թթ Հայաստանի վարկային բեռն ավելի ծանրացավ, բյուջեի պարտքը մոտենում է 6 մլրդ դոլարի, ինչն աննախադեպ իրավիճակ է ՀՀ պատմության մեջ:

Այնպես չէ, որ միավորումը հետապնդում էր տնտեսական զարգացման նպատակ, պարզապես Գագիկ Խաչատրյանը, նշանակվելով ֆինանսների նախարար, ունենալով ազդեցիկ դիրք, կարողացավ հասնել նրան, որ և ՊԵԿ-ից չզրկվի, քանի որ ՊԵԿ նախագահն էր, և ղեկավարի ֆինանսների նախարարի պաշտոնը:

Ովքե՞ր տուժեցին այս միացում-բաժանումից. տուժեց տնտեսությունը, քանի որ լինելով խիստ կենտրոնացած, Ֆինանսների նախարարությունը կարողանում էր վերահսկել և հարկերը, և ներկրումները, և վարկային քաղաքականությունը: Կառույցը վերածվել էր ֆինանսական միապետության:

Նախօրեին ՀՀ նախագահի հրամանով հարկային և մաքսային ծառայությունները բաժանվեցին ֆինանսների նախարարությունից: Այս անգամ ևս խնդիրը լուծվում է, ոչ թե ելնելով տնտեսական շահերից, այլ պարզապես դաշտում վերադասավորումներ են` «բաժանիր, որ տիրես» սկզբունքով:
Գագիկ Խաչատրյան և Հովիկ Աբրահամյան հակամարտությունը հասավ վերջնակետին ու այժմ վերջի սկիզբն է, իսկ թե ում` ցույց կտա ժամանակը:

Առաջին հայացքից տպավորություն է, որ վարչապետ Հովիկ Աբրահամյանը հասել է նրան, որ Գագիկ Խաչատրյանը զրկվի մի քանի հիմնական գործառույթներից, բայց այստեղ խնդիրն այլ է. երկրի 6 մլրդ պետպարտքը, մաքսային կամայական համակարգը, հարկային բեռից փակված ձեռնարկությունների խնդիրը մնաց վարչապետի տիրույթում և փաստացի Հովիկ Աբրահամյանը հայտնվեց ֆինանսական բեռի ծուղակում: