Ես ինձ մեղավոր եմ զգում, բայց ամաչելու ոչինչ չունեմ. Արամ Սարգսյան

«Մարտի 1-ը հարված էր մեր ժողովրդին, հարված էր մեր հասարակությանը, հարված էր մեր պետությանը: Այն բացահայտված է, բայց իրավական գնահատական դեռ չի ստացել: Նույնիսկ այդ օրվա բոլոր դրվագները բացահայտվել են, հրապարակվել, բայց կազմակերպիչները պատասխանատվության չեն ենթարկվել»,-Մյասնիկյանի արձանի մոտ լրագրողների հետ զրույցում ասաց քաղաքական գործիչ, 1994-95թթ. Հայաստանի Ազգային անվտանգության ծառայության ղեկավար Դավիթ Շահնազարյանը: Նա ասաց, որ իշխանությունները պետք է հասկանան, որ կազմակերպիչները պետք է դատարանի առաջ կանգնեն և այդ ամենը որքան շուտ լինի, այնքան լավ, հակառակ դեպքում մեր հասարակությունը, պետությունը չի կարող բնականոն զարգացման հնարավորություն ունենալ:

«Հանրապետություն» կուսակցության նախագահ Արամ Սարգսյանն էլ նկատեց, որ վստահաբար կարող է ասել, որ այդ օրվա իր գործունեությունից առանձնապես ամաչելու ոչինչ չունի.«Վերջիններից եմ եղել, որ այս հրապարակից իջել, տուն եմ գնացել: Մեղավոր եմ զգում նրա համար, որ այն մարդիկ, ովքեր բանսարկությամբ Երևան քաղաքում նման սպանդ կազմակերպեցին, ովքեր հրամանով անմեղ մարդկանց սպանեցին, ման են գալիս ու դատապարտված չեն: Մեղավոր եմ զգում, որ այն տղաները, ովքեր որ զոհվեցին, զոհվեցին ազատ, անկախ Հայաստան ունենալու, ավելի ապահովված ընտանիքներ ու բարեկեցիկ հարազատներ ունենալու, իրենց երեխայի ապագայի համար ու այդ գործընթացում մենք առաջընթաց չունենք»:

Նախկին քաղբանտարկյալ, ԳԽ պատգամավոր, Ազատ Արշակյանի կարծիքով էլ մարտի 1-ի շարժումն արդարության համար է և այն կարելի է հռչակել «Արդարասիրության» օր: Ըստ նրա` Մարտի 1-ը բացահայտելու համար իշխանափոխությունը պարտադիր է, այսպես թե այնպես լինելու է, սրանից առաջ ավելի կոպիտ իշխանավորներ են եղել»,- հավելեց Արշակյանը: