Մենք իրավական ու բարոյական իրավունք չունենք մտքով անգամ անցկացնել, որ Արցախի պետականությունը կարող է հարցականի տակ լինել․ Վրթանես եպիսկոպոս Աբրահամյան

«Արցախահայության վերադարձի ամենակարևոր երաշխիքը և միակ գրավականը Արցախի Հանրապետությունն է, պետականությունն է, որը հանդիսանում է ժողովրդին համախմբելու երաշխավորը»։

Այս մասին Ոռաբլուրում լրագրողների հետ զրույցում ասաց Արցախի թեմի առաջնորդ Գերաշնորհ տեր Վրթանես եպիսկոպոս Աբրահամյանը։

«Մեր պետականության հիմքում մեր հերոսների թափած արյունն է։ Մենք իրավական ու բարոյական իրավունք չունենք ոչ միայն չսատարելու, այլև մեր մտքով անգամ չպիտի անցնի, որ Արցախի պետականությունը կարող է հարցականի տակ լինել։ Այս առումով առաջին և միակ գրավականը արցախահայության վերադարձի, Արցախի Հանրապետությունն է»,-ասաց նա։

Նա իրավական առումով չի կարող ասել, թե ինչպե՞ս պետք է կազմակերպվի արցախցիների վերադարձը, բայց նշեց, որ բարոյական կողմն է նկարագրում։

«Դա մի շղթա է, որը չպետք է կտրվի։ Մնացած հարցերով թող քաղաքագետները, իրավաբանները զբաղվեն»,-նշեց տեր Վրթանես եպիսկոպոս Աբրահամյանը։

Նա նկատում է, որ Արցախում հայկական հետքը վերացնելու Ադրբեջանի վարած քաղաքականությանը նոր չէ, այն դեռ խորհրդային տարիներին կար։

«Ադրբեջանը միշտ փորձել և փորձում է Արցախի պատմամշակութային հուշարձանները դարձնել իրենը և կեղծ գործընթացներ էին տեղի ունենում։ Պատահական չէ, որ Խորհրդային Միության ժամանակ միակ տարածքը, որտեղ չէր գործում որևէ եկեղեցի, Արցախն էր», - ասաց ր Վրթանեսը։