Դաշնակցական նախարարը շարունակում է հանրապետական նախարարի քաղաքականությունը

ՀՀ կրթության և գիտության նախարար Լևոն Մկրտչյանը շրջաբերական է ուղարկել ՀՀ մարզպետներին և Երևանի քաղաքապետին: Մկրտչյանն առաջարկել է համապատասխան հանձնարարականներով բացառել ուսումնական հաստատություններում Մարտի 8-ի և Ապրիլի 7-ի տոնական միջոցառումների շրջանակում պարտադրված դրամահավաքի դրսևորումները: ՀՀ ԿԳՆ ենթակայության դպրոցների տնօրենները ևս ստացել են համապատասխան հանձնարարականներ:

Նշենք, որ նման շրջաբերական նախկին նախարար Արմեն Աշոտյանը ևս ուղարկում էր դպրոցներին, սակայն իրավիճակը դրանից չէր փոխվում: Գրեթե բոլոր դպրոցները այս կամ այն կերպ գումարներ են հավաքում` հավաքարարի փող, տետրերի փող, ֆոնդի փող և այլն:

Երևի թե նոր նախարարից ավելի կոնկրետ քայլեր պետք է սպասել, ոչ թե ՀՀԿ նախարարի որդեգրած ձևական ու ոչինչ չասող շրջաբերականն է:
Երևանի դպրոցներից մեկի ծնողը պատմեց, որ ծնողներից գումար են հավաքում դպրոցը վերանորոգելու, պատուհանները փոխելու և նման կարգի աշխատանքների համար: Դասղեկը տեղեկացրել է, որ իրենց երեխաները մի քանի տարի նույն դասարանում են սովորելու և պետք է ողջ դասասենյակը վերանորոգել:

Ծնողներից Նարինեն նշեց, որ ծնողկոմիտեն է զբաղվում դրամահավաքությամբ, և նրանց նշանակում են միայն փող հավաքելու համար, թե չէ ծնողկոմիտեն ինչ գործ ունի փողի հետ:

«Ծնողկոմիտեն զբաղվում է միայն դրամահավաքությամբ, այլ գործառույթ չունի»,- ասաց Նարինեն, հիշեցնելով, որ նախորդ տարի մարտի 8-ին գումար են հավաքել ուսուցիչների համար, դասղեկին արծաթյա զարդ են նվիրել, այս տարի դեռ չգիտի ինչքան են հավաքելու, բայց որ հավաքելու են` վստահ է:

Երևանի դպրոցներից մեկի ծնողը` Վահանը, պատմեց, որ դպրոցում անցած կիսամյակին 15 հազար դրամ են հավաքել և դասղեկը ծնողին ասել է, որ եթե որևէ ծնող գումար չտա, ինքն է ստիպված փոխարենը վճարելու:

Վահանը նաև նշեց, որ հաճախ է պատահում, որ ծնողկոմիտեն համառորեն գումարը կամ նվերը հանձնում է ուսուցչին կամ դասղեկին, թեև դրանից առաջ ուսուցիչները հայտարարել են, որ փող չհավաքեն:

Այնպես, որ ոլորտի խնդիրը շրջաբերականներով չի լուծվել և չի լուծվի, ավելի կոնկրետ քայլեր են անհրաժեշտ հեղափոխական դաշնակ նախարարից ոչ թե հանրապետական պոպուլիզմ, այլ դաշնակցական հեղափոխություն: