«Աշտարակ-կաթ»-ի խնդիրների պատճառը ագահությունն է

Մի կողմից արտագաղթը, մյուս կողմից սոցիալական ծանր վիճակը հանարապետությունում մեծ ընկերությունների համար խնդիրներ են առաջացնում և հաճախ տանում լուծարման:

«Աշտարակ-կաթ» փակ բաժնետիրական ընկերությունը խնդիրների մասին լուրը շրջանառվում էր դեռ անցյալ տարվանից:
Այն ժամանակ ՀՀ գյուղնախարար Սերգո Երիցյանը հայտարարեց, որ «Աշտարակ-կաթ»-ը պարտքեր է կուտակել, և գյուղնախախարությունն էլ փորձում է հնարավորինս օգնել, որպեսզի գոյացած պարտքերի պատճառով` ընկերությունը չլուծարվի:

Այսօր արդեն գործարանի աշխատակիցներից մի քանիսը newspress.am-ի հետ զրույցում նկատեցին, որ մատնվել են ժամանակավոր պարապուրդի:

«Ընկերությունը չի կարողանում իրացնել ապրանքը, արտադրանք չի տալիս, մեզ էլ տուն են ուղարկել: Ասել են «Աշտարակ-կաթ»-ը կարող ա լուծարվի ու անվանափոխվի»,- ասացին աշխատողները:

Մեզ հետ զրույցում «Աշտարակ-կաթ» ՓԲԸ հասարակայնության հետ կապերի պատասխանատու Լուսինե Հովհաննիսյանը նկատեց. «այո, ընկերությունը խնդիրներ ունի, բայց գործունեությունը չի դադարեցնի և կշարունակի մատակարարել ամբողջ հանրապետությանը»:

«Կան սեզոնայնության հետ կապված որոշ խնդիրներ: Բոլոր ընկերություններում էլ, հատկապես փետրվար ամսին լինում են նման խնդիրներ: Սպառողների թիվը նվազել է, վճարունակությունն էլ կտրուկ անկում է ապրել, նվազել են նաև արտահանման ծավալները, դա էլ անմիջապես հարվածում է ընկերությանը: Բայց «Աշտարակ-կաթ»-ը շարունակում է իր գործունեությունը»,- մանրամասնեց Լուսինե Հովհաննիսյանը:

Նրա խոսքով առաջացած խնդիրները գտնվում են տնօրինության հսկողության ներքո և ովքեր փորձում են ամենասեղմ ժամկետներում լուծել դրանք:

Լուսինե Հովհաննիսյանը հերքեց լուրերը, ըստ որի աշխատողներից ոմանք ժամանակվոր պարապուրդի են մատնված և հնարավոր է «Աշտարակ-կաթ»-ը անվանափոխվի:

«Եթե նման բան լինի` ընկերությունը պաշտոնապես կհայտարարի: Դա ապատեղեկատվություն է: Բրենդի հետ կապված նույնպես փոփոխություն չի լինի»,- եզրափակեց ընկերության աշխատակցուհին:

Մեզ հետ զրույցում գյուղնախարարության մասնագետներից մեկը նկատեց, որ ընկերությունը գյուղացուց կաթը ձեռք է բերում բավական էժան գներով և վերամշակման արդյունքում փորձում կրկնակի եկամուտ ստանալ, ինչն էլ նվազեցնում է սպառողների թիվը: Նրա խոսքով` ընկերությունը փորձում է գերշահույթ ստանալ ու. եթե ահագահություն չանի` նման խնդիրների առաջ չի կանգնի: