Միհրանները գեներալացվում են, երկիրը` դեգրադացվում

ԴԱՀԿ պետ Միհրան Պողոսյանը սովորաբար ինքն է հայտնվում մամուլի ուշադրության կենտրոնում, մեկ որպես այս կամ այն բիզնեսի փայատեր, մեկ որպես բանանի քերթողահայր, մեկ որպես լավ քեռի ունեցող տղա, ու մեկ էլ որպես ԴԱՀԿ պետ: Ինքը` Քեթրին Միհրանը, մի տեսակ նեղվում է, որ իրեն կապում են բիզնեսի հետ ու ամեն անգամ «չորով» հրաժարվում է իր բիզնեսներից:

Հիմա արդեն ուշադրության թոփում հայտնվել է Միհրանի տիկինը: Պարզվում է` տարեկան 0 տոկոս եկամուտ ունեցող ԴԱՀԿ պետի տիկինը գնել է 70. 000 դոլար արժողությամբ «RANGE ROVER SPORT-HSE» մակնիշի ավտոմեքենա, սա այն դեպքում, երբ գլխավոր հարկադիրը իր եկամուտների հայտարարագրման մեջ այնքան զուսպ է, որ հարցերի տեղատարափ է առաջանում` որտեղից, ինչ միջոցներով այդ գումարները սույն չինովնիկին, որին չգիտես որ առավելության համար է իշխող վերնախավը այսպես գուրգուրում ու փայփայում: Սա նույն այն Միհրանն է, որը ամիսներ շարունակ հազարավոր քաղաքացիների հանդեպ հարկադիրից վերածվել էր «քերթողի» և կալանք դրեց մարդկանց հաշիվների վրա, նրանց տեղի-անտեղի քարշ տալով հարկադիրից բանկ, բանկից էլ հարկադիր և ոչ մի պատասխանատվություն:

Միհրանի նման չինովնիկը ԱՄՆ-ում միանգամից կենթարկվեր պատասխանատվության ու կհայտնվեր համապատասխան վայրում` առանց հայրական կամ մայրական կողմի ծագումնաբանությունն ուսումնասիրելու: Իսկ Հայաստանում միհրանները ամեն ժամ ծաղկում ու ծաղկաբույլ են դառնում` անձեռնմխելի ծաղկաբույլ, ու այս տեսակը սիրվում է իշխանության կողմից, նրանց անգամ թույլատրվում է պատգամավոր ունենալ ԱԺ-ում և ԱԺ-ն օգտագործել ի շահ յուրյանց: Օրինակ առաջիկա քառօրյայում կքննարկվի ՀՀԿ պատգամավոր Արթուր Ստեփանյանի և Արտակ Սարգսյանի կողմից մոտ վեց ամիս առաջ շրջանառության մեջ դրված օրենսդրական մի նախագիծ, որով առաջարկում է փոփոխություն կատարել ՀՀ քաղաքացիական օրենսգրքում` խստացնելով վարձակալության պայմանագրի պայմանները:

Մինչդեռ նույն խորհրդարանում տարիներ շարունակ դեգերում է գիտությանն առնչվող մի նախագիծ, բայց քանի որ այն չի առնչվում միհրաններին կամ ոմանց բիզնեսին, ապա նման նախագծերը դեգերման երկար փուլ կանցնեն: Իսկ Քաղաքացիական օրենսգրքում փոփոխություն առաջարկող նախագծի հեղինակ Արթուր Ստեփանյանը «Քեթրին գրուպ»-ի նախկին տնօրենն է, ԴԱՀԿ պետ Միհրան Պողոսյանի հովանավորյալը: Նրա կողմից նախագիծը ներկայացնելը պատահականություն չէ: Ըստ շրջանառվող լուրերի, Հայաստանում տարածքների վարձակալության բիզնեսով զբաղվող ամենահայտնի պաշտոնյան թիվ մեկ հարկադիր Միհրան Պողոսյանն է, ով ժամանակին վարձակալության հետ կապված դատական վեճի մեջ էր Սթար խանութների ցանցի սեփականատիրոջ հետ: Խոսքը հինգ միլիոն դոլար և ավել գումարի մասին էր: Դատարանում կողմերը եկան համաձայնության, և չինովնիկ ԴԱՀԿ պետ Միհրան Պողոսյանն, ըստ հրապարակումների, զիջեց իր 5 մլն դոլար պարտքի մեծ մասը:

Այս գումարի՝ 1․5 մլրդ դրամը, գոյացած տոկոսներով, փաստորեն, ԴԱՀԿ պետը զիջել է Գևորգ Աֆանդյանին, նրանից պահանջելով ընդամենը 499 մլն դրամ: Միհրան Պողոսյանի հովանավորյալի կողմից ներկայացված նախագիծը, թերևս հնարավորություն կտա 39 ամյա գեներալին իր վարձակալների նկատմամբ լիարժեք վերահսկողություն ունենալ առանց գումարի կորստի: Ահա թե ինչ է նշանակում լինել իշխանության հովանու տակ և ունենալ հովանավորյալ ԱԺ-ում: Հենց միհրանների ներգրավմամբ է մեր տնտեսության վիճակը այսպիսին, քանի որ միհրանատեսակ չինովնիկներն են թելադրում չինովնիկական ապարատի գործառույթը: Ու քանի դեռ այս տեսակը գեներալացվում է`տրամաբանական է, որ երկիրը պետք է դեգրադացվել: