Բիզնես չունեցող միլիոնատեր ՄԻՊ-ը

Հրապարակվել է Մարդու իրավունքների նորընտիր պաշտպան Արման Թաթոյանի 2014թ-ի գույքի և եկամուտների մասին հայտարարագիրը:
Նկատենք, որ Արման Թաթոյանը 2013թ. նոյեմբերից մինչ օրս աշխատում է ՀՀ արդարադատության նախարարի տեղակալի պաշտոնում ու, քանի որ նորընտիր օմբուդսմենի կենսագրության մեջ չկա նրա բիզնեսի մասին հիշատակող որևէ տվյալ, ուստի Բարձրաստիճան պաշտոնատար անձանց էթիկայի հանձնաժողովի կողմից հրապարակված հայտարարագիրը ՀՀ արդարադատության փոխնախարարի եկամուտների վերաբերյալ է:

Հետաքրքիր է, բայց փաստ, որ առանց եկամտի այլ աղբյուրների՝ մեր չինովնիկներին հաջողվում է միայն պաշտոնի շնորհիվ լավ եկամուտներ ունենալ:

Եվ այսպես՝ Արման Թաթոյանը 2014թ-ի սկզբին ունեցել է մարդատար ավտոմոբիլային տրանսպորտի միջոց՝ LEXUS RX 330 մակնիշի, որը նույն տարվա վերջին օտարվել է 5,8 մլն դրամի դիմաց:

Նրա դրամական միջոցները 2014թ-ի սկզբին կազմել են 15 մլն 300 հազ. դրամ, 3,500 ԱՄՆ դոլար և 8.500 եվրո, որոնք տարեվերջին նվազել են՝ կազմելով 700 հազ. դրամ, և 4000 եվրո: Թե ինչի վրա է պաշտպանը ծախսել այս գումարը, հայտարարագրում նշված չէ:

Հարկային տարում նրա եկամուտները կազմել են 15 մլն 34 հազ. դրամ, ինչը գոյացել է տարվա ընթացքում օտարված գույքի, աշխատանքի վարձատրության և քաղաքացիաիրավական այլ պայմանագրերից ստացված եկամուտներից:

Արման Թաթոյանի հետ համատեղ ապրող ծնողների ներկայացված հայտարարագրերում որևէ տվյալ առկա չէ, իսկ կնոջ՝ Գայանե Մակարյանի ֆինանսական միջոցները 2014թ-ի սկզբին կազմել են 3 մլն 800 հազ. դրամ, ինչը տարեվերջին դարձել է 400 հազ. դրամ: Սակայն հայտարարագրում նշված չէ, թե ինչի վրա են ծախսվել այդ գումարները: Ինչպես նաև տեղեկություններ չկան, թե նրա եկամտի աղբյուրի մասին:

Կայքում դեռևս չկան պաշտոնյանների գույքի և եկամուտների մասին 2015թ-ի հայտարարագրերը: