Սամվել Բալասանյանի հոգու և ճակատի ամոթը

Գյումրին հիմնականում եղել է ՀՀԿ քաղաքապետերի ձեռքին: Վերջին քաղաքապետը քաղաքական առումով խառնուրդ է. նախ ճակատին դաջեց արդեն «լուսահոգի» ՕԵԿ-ին, երդվեց, որ այդ դաջվածքը իրեն կուղեկցի միշտ: Բայց այդ դաջվածքը այնքան էր բարոյալքվել, որ անգամ ՕԵԿ հիմնադիր Ա.Բ-ն հրաժարվեց այդ անվանումից, չնայած որ Ա.Բ-ն ճակատին չէր էլ դաջել: 

Գյումրու գործող քաղաքապետ Սամվել Բլասանյանը ժամանակին, երբ հրաժարվեց հայտնի դաջվածքից, պատճառ ուներ` քաղաքական բարգավաճման կուրս էր ընդունել: Այնպես չէ, որ Բալասանյանը բարգավաճած չէ: Նրա ընտանիքին է պատկանում «Գյումրի գարեջուր» ընկերությունը: Բալասանյանը, ըստ շրջանառվող լուրերի, բիզնեսներ ունի նաև Երևանում, Ջավախքում, Բաթումիում, Մոսկվայում: Բայց ամեն օր բարգավաճող Բալասանյանը որոշեց այստեղից էլ հեռանալ` ՀՀԿ-ացման հեռանկարով, քանի որ ՀՀԿ-ն ամենաապահով տեղն է հարստանալու, բայց միաժամանակ ցույց տալու, որ ապրում ես չոր աշխատավարձով, քաղաքապետի աշխատավարձն էլ ուղարկում Գյումրու անօթևաներին: Այս առումով նույնիսկ Բալասնյանը սրտաճմլիկ ելույթ ունեցավ, թե ինքն աշխատավարձ չի ստանա այնքան ժամանակ, քանի դեռ Գյումրիում մեկ անօթևան կա: 

Իսկ Գյումրիում երկրաշարժից 27 տարի անց էլ դեռ 3000 ընտանիք է ապրում տնակներում, որը առաջին հերթին Գյումրին ղեկավարած քաղաքապետի ամոթն է: Օրերս գյումրեցի լուսանկարիչ Հայկ Բարսեղյանը հանդես էր եկել դրամահավաքի նախաձեռնությամբ` Գյումրու տնակներում ապրող 13 ընտանիքի համար բնակարան ձեռք բերելու նպատակով: Լուսանկարիչը լավ առիթ էր ստեղծել Սամվել Բալասանյանի համար: Բալասանյանը մասնակցելով այս դրամահավաքին` կարող էր ցույց տալ, որ մտահոգ քաղաքապետ է կամ պարզապես պոպուլիզմով տառապող մի հերթական պաշտոնյա: Դրամահավաքին պարզվում է, որ Բալասանյան ամբողջ ընտանիքը փոխանցել է 500.000 դրամ, մոտավորապես այնքան, որքան ասենք Գագիկ Շամշյանը միայնակ կամ օրինակ դերասան Հայկ Մարությանը` կրկին միայնակ: Մինչդեռ նույն Բալասանյանը այդքան անօթևանների ֆոնին Գյումրիում ունի տարբեր տրամաչափի շենք-շինություններ, հողատարածքներ, և այն փոխանցումը, որ կատարել է Բալասանյան ընտանիքը, դա չափման այն միավորն է, թե որքանով է քաղաքապետ Բալասանյանը իրականում մտահոգված, որ Գյումրու ճակատին վերանա անօթևանի խարանը: