Պռոշյանի կոնյակի գործարանը խաղողագործներին «քցում է»

Արարատի մարզի Այգեպատ համայնքի բնակիչ Անգինը անցած տարի 2 տոննա 700 կգ սև կախեթ տեսակի խաղող է հանձնել Պռոշյանի կոնյակի գործարանի Այգեստանի մասնաճյուղ:

Նախ կարողացել են մեծ դժվարությամբ հանձնել խաղողը 120 դրամով, հետո խոստացել են հունվարի 10-ին վճարել, սակայն խաղողագործներին հունվարին ասել են, որ կվճարեն մայիսին:

«Մենք վարկ ունեինք մուծելու, օրն անցնում էր, գնացի դիմեցի իրենց, ասացին, որ կարող ես գալ, եթե ցանկանում ես 105 դրամով ստանաս, ստիպված գնացի ստացա 280000 դրամ, պիտի 320 000 դրամ տային»,- ասաց Անգինը, հավելելով, որ գործարանն առիթից օգտվում է, քանի որ մարդիկ նեղ վիճակում են, վճարում են ավելի պակաս:

Տիկին Անգինը նաև նշեց, որ Այգեպատ համայնքում մարդիկ հիմնականում խաղողի վազերը հողով չեն ծածկել, որ սովորաբար անում են, քանի որ գումար չի եղել, պետք է վճարել նման աշխատանքի համար:

Ըստ նրա, Այգեպատում մարդիկ կան ովքեր խաղողի վազերը հանել գցել են, քանի որ դեռևս մթերված խաղողի գումարները չեն էլ ստացել:
2015թ-ի նման վատ տարի` որ բերքն առատ լիներ, մթերումներն այդքան վատ, տիկին Անգինը չի հիշում:

«Մարդիկ շվար են, չգիտեն խաղողը մշակեն, թե չէ»,- տարակուսած ասաց տիկին Անգինը: