Կարապետ Պողոսյանի խափանման միջոցը փոխվել է. «Հրապարակ»
![Կարապետ Պողոսյանի խափանման միջոցը փոխվել է. «Հրապարակ»](/timthumb.php?src=disc/01-07-24/6d881ea274cdbb6ab638226c58f47120.jpg&w=780)
Գեղարքունիքի մարզի ընդհանուր իրավասության առաջին ատյանի դատարանը 2000000 ՀՀ դրամ գրավի դիմաց գյումրեցի իրավապաշտպան, ընդդիմադիր գործիչ Կարապետ Պողոսյանի նկատմամբ կիրառել է տնային կալանք՝ խիստ սահմանափակումներով։ Կարապետ Պողոսյանն այսօր արդեն տանն է։ Այս մասին քիչ առաջ Hraparak.am-ին տեղեկացրեց իրավապաշտպանի կինը՝ Անգին Մալխասյանը։ «Չնայած սահմանափակումներին, գործը հարուցված է, կարևորը այս պահին Կարապետը տանն է, մեր կողքին, ինչ-որ առումով հանգիստ եմ»,- ասաց նա։
Հիշեցնենք, որ մենք անդրադարձել էինք Կարապետ Պողոսյանի կալանավորմանը, գյումրեցի քաղակտիվիստին ձերբակալել էին հունիսի 5-ին, երբ նա գնացել էր Վարդենիս` մասնակցելու Բագրատ սրբազանի հանրահավաքին, սակայն ճանապարհին Պարեկային ծառայության աշխատակիցները նրան դուրս են հանել երթի շարքերից ու տեխզննման փաստաթուղթ չունենալու հիմքով` առգրավել մեքենան: Նույն պահին Կարապետ Պողոսյանը պարեկային ծառայության մեքենայի միջից ֆեյսբուքյան ուղիղ եթերով հայտնում է, որ իր գլխին գործ են սարքել, և որ իր կողքին նստած լեյտենանտը խոստովանել է, թե ցուցում է ստացել իրեն Մարտունու ոստիկանության բաժին տանելու։