Երևանի զարդարվեստի պետական ուսումնարանի սաներն իրենց գործերը ներկայացրին տարեվերջյան հաշվետու ցուցահանդեսում (տեսանյութ, լուսանկարներ)
Երևանի զարդարվեստի պետական ուսումնարանում տեղի ունեցավ տարեվերջյան հաշվետու ցուցահանդես։ Կրթօջախի սրահներում իրենց աշխատանքներն էին ներկայացրել բոլոր բաժինների առաջին և երկրորդ կուրսերի ուսանողները։
Ներկայացված էին փայտի և մետաղի գեղարվեստական փորագրություններով իրեր, մանրանկարչության ու գեղարվեստական ձևավորման գործեր, ինչպես նաև դիզայնի, ոսկերչության, ասեղնագործության-գոբելենագործության աշխատանքներ։
Ստեղծագործություններից ոչ մեկը չէր զիջում մյուսին։
Ցուցահանդեսի մասնակիցներն ուսանողների ծնողներն ու հարազատներն էին, ովքեր հետաքրքրությամբ շրջում էին սրահներում ու, աշխատանքների հետ կապված, իրենց հետաքրքրությունները բավարարում հենց ուսանողերի մեկնաբանությամբ։
Վերջիններս, որպես էքսկուրսավարներ, ոգևորությամբ իրենց հյուրերին էին ներկայացնում, թե ինչ նյութերով են աշխատել, ինչպես ու որքան ժամանակում են ստացել այս կամ այն գործը։
Հարկ է նկատել, որ այս ուսումնարան ընդունվում են հիմնական կրթություն ստացած աշակերտները, ովքեր այստեղ ստանում են միջին մասնագիտական կրթություն:
«Երևանի զարդարվեստի պետական արհեստագործական ուսումնարան›› ՊՈԱԿ ուսուցանվում են հետևյալ մասնագիտությունները.
- Գեղարվեստական ձևավորման աշխատանքներ և դիզայն, որակավորումը՝ ձևավորող ցուցափեղկերի
- Գեղանկարչություն և քանդակագործություն, որակավորումը՝ արհեստավոր –մանրանկարիչ
- Գեղանկարչություն և քանդակագործություն, որակավորումը՝ փորագրող` մետաղյա գեղարվեստական իրերի
- Գեղանկարչություն և քանդակագործություն, որակավորումը՝ փորագրող` փայտյա գեղարվեստական իրերի
- Ոսկերչություն, որակավորումը՝ ոսկերիչ
- Գորգագործություն և ժանյակագործություն, որակավորումը՝ գոբելենագործ
- Վարսավիրական արվեստ և զարդային դիմահարդարում, որակավորումը՝ վարսահարդար
- Տրանսպորտային միջոցների շահագործում և նորոգում, որակավորումը՝ փականագործ` ավտոմոբիլային տրանսպորտի նորոգման:
NEWSPRESS.am-ը ներկայացնում է հաշվետու ցուցահանդեսի սրահներից մեկը, որտեղ ներկայացված են «Գեղարվեստական ձևավորման աշխատանքներ և դիզայն» բաժնի 1-ին և 2-րդ կուրսերի ուսանողների աշխատանքները։
Արմինե Մկրտումյան