Ղարաբաղյան հակամարտության կարգավորման համար որևէ քայլ չի արվում. Ագրամունտ

«Ղարաբաղյան հակամարտությունը սառեցված է արդեն ավելի քնա 20 տարի և այն կարգավորելու ուղղությամբ որևէ քայլ չի արվում: Լեռնային Ղարաբաղի և Արդբեջանի յոթ տարածքների անօրինական և միջազգային նորմերին հակասող օկուպացիան Հայաստանի կողմից պետք է կարգավորվի»,- այս մասին ադրբեջանական APA-ին տված հարցազրույցում հայտարարել է ԵԽԽՎ նախագահ Պեդրո Ագրամունտը:

Միևնույն ժամանակ, անդրադառնալով ԵԽԽՎ ձմեռային նստաշրջանում Ռոբերտ Ուոլթերի հակահայ զեկույցի տապալմանը և հարցին, թե հնարավո՞ր է դա արդյունք է ԵԽԽՎ նկատմամբ կիրառված ճնշման, Ագրամունտը նշել է, որ իրենք բոլորվին անկախ կառույց են և այդպես լինում է՝ որոշ զեկույցներ ընդունվում են, որոշները՝ տապալվում: Բայց Վեհաժողովը ճնշման չի ենթարկվել:

«Ոչ ոք չի կարող մեզ ուղղություն տալ, թե մենք ինչ անենք և ինչպես: Այդ և այլ որոշումներ կարող է ընդունել միայն մեր անկախ Վեհաժողովը»,- ասել է նա:

Ագրամունը նաև նշել է, որ ԵԽԽՎ տարածքում Ղարաբաղյան հակամարտությունը թերևս ամենակարևոր հակամարտություններից մեկն է.
«ԵԽԽՎ-ում իմ նախագահության ընթացքում ես այս հարցը կպահեմ ուշադրության կենտրոնում և բոլոր ջանքերը կգործադրեմ, որպեսզի հնարավոր դառնա կազմակերպել երկու երկրների ներկայացուցիչների հանդիպումը: Ես կաշխատեմ խրախուսել պաշտոնական անձանց և երկու երկրների իշխանությունների ջանքերը՝ ուղղված հակամարտության դրական և վերջնական լուծմանը»:

Նշենք, որ Ագրամունտը կիրակի օրը կայցելի Ադրբեջան, որտեղ հանդիպումներ կունենա այդ թվում նաև Ադրբեջանի նախագահի հետ: