Ահաբեկչություններ Դաղստանում. կան մեծ թվով զոհեր և վիրավորներ
Դաղստանում ահաբեկչությունների զոհ են դարձել ավելի քան 15 ոստիկան, զոհվել են նաև մի քանի խաղաղ բնակիչներ:
Այս մասին ասել է շրջանի ղեկավար Սերգեյ Մելիքովը։
«Տեղի ունեցած ահաբեկչության զոհ են դարձել ավելի քան 15 ոստիկան՝ զենքը ձեռքներին պաշտպանելով Դաղստանի խաղաղությունն ու անդորրը»,- ասել է շրջանի ղեկավարը Telegram-ի իր ալիքում:
Բացի այդ, հավելել է Մելիքովը, զոհվել են մի քանի խաղաղ բնակիչներ։ Հանրապետությունում հունիսի 24-ը, 25-ը և 26-ը սգո օրեր են հայտարարվել։
Կիրակի երեկոյան մի խումբ զինված մարդիկ գնդակոծել են Դերբենտում գտնվող սինագոգը և եկեղեցին։ Արդյունքում շենքերում հրդեհ է բռնկվել։ Նույն պահին Մախաչկալայում հարձակում է տեեղի ունեցել ճանապարհային ոստիկանության շենքի վրա: Բացի այդ, ևս մեկ հարձակում է տեղի ունեցել Սերգոկալա գյուղում։ Այնտեղ հարձակվողները կրակել են ոստիկանական մեքենայի վրա, իսկ սպաներից մեկը վիրավորվել է։
Հանրապետությունում սահմանվել է հակաահաբեկչական գործողության ռեժիմ: