Աշոտ Աղաբաբյանը «Մալաթիայի» առեւտրականներին շահավետ առաջարկ է անում. «Ժամանակ».

«Ժամանակ» թերթը գրում է. «Երեկ «Մալաթիա» տոնավաճառում ցույցի ելած առեւտրականները, որոնք նաեւ փակել էին տոնավաճառին կից Րաֆֆու փողոցը ու պահանջում էին իջեցնել վարձավճարները, գրեթե բացասական պատասխան ստացան տոնավաճառի սեփականատեր Սամվել Ավետիսյանից։ Վերջինս առեւտրականներին առաջարկեց հեռանալ«Մալաթիա» տոնավաճառից, եթե իր առաջարկած պայմանները չեն բավարարում իրենց։

Նշենք, որ բողոքի ելած տոնավաճառի աշխատակիցները պահանջում էին 80 հազար դրամ սահմանել միջին վարձավճարը՝ ներկա 160 հազարի փոխարեն, քանի որ առեւտուր չկա, ու իրենք չեն կարողանում աշխատել։ Բարկացած որոշ աշխատակիցներ առաջարկեցին գնալ «Հրազդան» տոնավաճառ։

«Ժամանակին «Մալաթիան» առաջարկել է արտակարգ պայմաններ, հիմա էլ ես եմ առաջարկում արտակարգ պայմաններ, կգան՝ կգան, իրանց խնդիրն ա, ես ոչ իրավունք ունեմ, ոչ էլ ինձ թույլ կտամ, որ ասեմ՝ եկեք իմ մոտ։ Պայմաններ գոյություն ունեն, եթե էդ պայմաններն իրանց ձեռք են տալիս, թող իրենք գան», – մեզ հետ զրույցում ասաց «Հրազդան» տոնավաճառի սեփականատեր Աշոտ Աղաբաբյանը՝ շարունակելով. «Մեր մոտ 80 հազար, 60 հազար չի, մեր մոտ 50 հազար է վարձավճարը»։

Աղաբաբյանի խոսքով՝ առեւտրով զբաղվողների բողոքի պատճառն այն է, որ տոնավաճառներում առեւտուրը շատ նվազել է, «որովհետեւ բացվեցին գիգանտներ եւ սուպերմարկետներ, մոլեր, տոնավաճառներից առեւտուրը գնալով պակասում է»։

Հետաքրքրվեցինք, թե ինչպես է, որ ինքը 50 հազար դրամ վարձավճար է սահմանել, իսկ «Մալաթիայի» սեփականատեր Սամվել Ավետիսյանն ասում է՝ չի կարող իջեցնել վարձավճարները, Աղաբաբյանը պատասխանեց. «Էդ արդեն իրան հարցրեք, ինձ մի հարցրեք»։

Նշենք, որ անցյալ տարի սնանկացած «Հրազդան» մարզադաշտի սեփականատերը պատրաստվում է առողջացման ծրագիր ներկայացնել»:

Առավել մանրամասն՝ թերթի այսօրվա համարում