Արևմուտքը Հայաստանը դիտարկում է որպես ՌԴ դեմ հիբրիդային պատերազմի գործիք․ հուսով ենք՝ ՀՀ ղեկավարությունը կունենա բավականաչափ քաղաքական խոհեմություն․ Միխայիլ Գալուզին

Ռուսաստանի փոխարտգործնախարար Միխայիլ Գալուզինը հայտարարել է, որ արևմտյան երկրները Երևանին դրդել են սառեցնել մասնակցությունը Հավաքական անվտանգության պայմանագրի կազմակերպությանը (ՀԱՊԿ): Այս մասին հայտնում է «Կոմսոմոլսկայա պրավդա»-ն։

Նա նշել է, որ Վաշինգտոնը պղտորում է ջրերը՝ հմտորեն և վաղուց հաստատված սխեմայի համաձայն։

«Գաղտնիք չէ, որ «բաժանիր և տիրիր» սկզբունքը ակտիվորեն կիրառվում է Արևմուտքի կողմից մեր բարեկամ երկրների նկատմամբ։ Նպատակն ակնհայտ է՝ մասնատել հետխորհրդային տարածքը, ընդհարել մեր երկրներին ու ժողովուրդներին, փոխգործակցության անբարենպաստ օրինաչափություններ պարտադրել, նրանց մղել համաշխարհային գործընթացների լուսանցք»,- ասել է Միխայիլ Գալուզինը՝ հավելելով, որ հենց այս բացարձակ ապակառուցողական օրակարգով է, որ ԱՄՆ-ն փորձում է «զարգացնել» հետխորհրդային տարածքը և իրականում հետամուտ լինել իր «գաղութացմանը»։

Նա ընդգծել է, որ Վաշինգտոնն ու Բրյուսելը հսկայական ճնշում են գործադրում ՌԴ բարեկամ երկրների վրա՝ փորձելով սահմանափակել փոխգործակցությունը Ռուսաստանի հետ։

 «Մենք անկեղծորեն կարևորում ենք մեր կապերը Հայաստանի հետ և փորձում ենք դրանք կառուցել փոխադարձ հարգալից և փոխշահավետ ձևով։ Արևմուտքը՝ ընդհակառակը, հանրապետությունը ուտիլիտար է դիտարկում՝ որպես Ռուսաստանի և Հարավային Կովկասի այլ երկրների դեմ հիբրիդային պատերազմի գործիքներից մեկը։ Նպատակը պարզ է՝ օգտագործել հայկական «կամուրջը» տարածաշրջանում լարվածության հերթական օջախ ստեղծելու համար։

Արևմտյան մայրաքաղաքներում պատրաստ են հանգիստ «խաղադրույք անել» հանրապետության սոցիալ-տնտեսական իրավիճակի և անվտանգության վրա։ Միացյալ Նահանգների, Եվրամիության և ՆԱՏՕ-ի ներկայացուցիչները կոչ են անում Երևանին խզել բոլոր կապերը Մոսկվայի հետ և ձգտում են դուրս բերել հանրապետությունը ընդհանուր ինտեգրացիոն միություններից։

Տեսնում ենք, որ Հայաստանին ակտիվորեն գայթակղում են եվրոպական հեռանկարով։ Դժվար չէ կռահել, որ երկրին կհամոզեն հրաժարվել այն մեխանիզմներից, որոնք վերջին տարիներին ռեկորդային աճ են ապահովել նրա տնտեսությանը։ Ռուսաստանի հետ տնտեսական կապերի խզումը կնշանակի հայկական բիզնեսի հիմնական շուկայի կորուստ»,- ասել է նա։

Գալուզինը հիշեցրել է, որ 2023 թվականին Հայաստանի և Ռուսաստանի Դաշնության միջև ապրանքաշրջանառությունը հասել է պատմական առավելագույնի՝ 700 միլիարդ ռուբլու։

«Ժամանակի ընթացքում Երևանից կպահանջվի դուրս գալ ԵԱՏՄ-ից, որտեղ հանրապետությունը հիմնական շահառուներից է։ Անցյալ տարի նրա արտաքին առևտրաշրջանառության գրեթե 40 %-ը միության երկրների հետ է եղել։ Հայաստանը կկորցնի Միությունում ձևավորվող միասնական էներգետիկ շուկային մասնակցելու հնարավորությունը։

Ցավոք սրտի, արևմտյան նարատիվների ազդեցության տակ տեղի է ունեցել երկկողմ քաղաքական շփումների կտրուկ նեղացում։ Երևանից գնալով ավելի հաճախ են հնչում Ռուսաստանի, ՀԱՊԿ-ի, անվտանգության առկա համակարգի անհիմն քննադատությունները։ Սա, մեղմ ասած, ապակառուցողական և անհեռատես քայլ է։

Երևանի լիարժեք մասնակցությունը ՀԱՊԿ-ի աշխատանքներին համապատասխանում է հայ ժողովրդի ձգտումներին և ծառայում է Հարավային Կովկասում խաղաղության և կայունության պահպանման գործին։ Ինչպիսին էլ որ լինեն արևմտյան երկրների խոստումները, որոնք Հայաստանի իշխանություններին դրդել են «սառեցնել» մասնակցությունը ՀԱՊԿ-ին, Հայաստանի անվտանգության ավելի արդյունավետ մեխանիզմի ապահովման այլընտրանքներ չկան։

ՀԱՊԿ-ի ներուժի մեծացման աշխատանքները համակարգված են ընթանում՝ Երևանին թողնելով հետևում։ Մշակվում են ճգնաժամային արձագանքման նոր ալգորիթմներ, ամրապնդվում են կազմակերպության Հավաքական ուժերի հնարավորությունները՝ հաշվի առնելով ռուսական մարտական փորձը, և ընդունվում են լուրջ ծրագրային փաստաթղթեր Կենտրոնական Ասիայում մեր դաշնակիցների սահմանային անվտանգությունն ապահովելու համար։

Անվտանգության ոլորտում Հայաստանի ինքնիշխանության հետագա քայքայումը և ԱՄՆ-ի և ՆԱՏՕ-ի «թղթե վահանի» տակ անցումը պարզապես անհնարին կդարձնի Ռուսաստանի հետ և ՀԱՊԿ-ի շրջանակներում միասնական պաշտպանական տարածքի պահպանումը»,- ասել է ռուս դիվանագետը։

«Մեր կողմից  բազմիցս և տարբեր մակարդակներով հստակ հայտնել ենք մեր պատրաստակամությունը քննարկելու Երևանին հուզող հարցերը։ Ընդգծել ենք, որ Մոսկվան հավատարիմ է եղել և մնում է համաձայնությունների ողջ շրջանակին թե՛ երկկողմ մակարդակով, թե՛ ընդհանուր ինտեգրացիոն կառույցների շրջանակներում, և չենք հրաժարվել դաշնակիցների հանդեպ ստանձնած պարտավորություններից։

Բայց մեր տարբեր նախաձեռնություններին ոչ մի արձագանք չենք ստացել։ Մենք հուսով ենք, որ Հայաստանի ղեկավարությունը կունենա բավականաչափ քաղաքական խոհեմություն՝ հասկանալու Արևմուտքի խոստումների պատրանքային բնույթը և Ռուսաստանի հետ հարաբերությունների կարևոր նշանակությունը հանրապետության ինքնիշխանության, անվտանգության և տնտեսական զարգացման տեսանկյունից»,- ասել է Գալուզինը։