Տարոն Մարգարյանը քանդում է և զայրանում

Երևանի քաղաքապետ Տարոն Մարգարյանն արդեն 5 տարի քաղաքապետ է, իսկ դրանից առաջ 4 տարի եղել է Ավան վարչական շրջանի ղեկավար: Այսինքն բավարար է Երևան քաղաքի քաղաքաշինական խնդիրներին ծանոթ լինելու համար:

Երբ տարիներ առաջ սկսվեց Երևանի մշակութային շենքերի հանդեպ քաղաքային իշխանությունների վանդալիզմը, Տարոն Մարգարյանը ՏԻՄ փորձառության առումով ավելի քան հասուն էր, հասկանալու համար, որ Երևանի հուշարձանները պահպանել է պետք, քանի որ այլ ապացույցներ, որ Երևանը 2700 տարվա պատմություն ունի, միայն Էրեբունի բլրից և սեպագիր արձանագրությունից ոչինչ չկա: Եվ այդ է պատճառը, որ հաճախ է շահարկումների առիթ դառնում, թե Երևանը հայկական չէ, քանի որ միջնադարյան ժամանակաշրջանում թուրքեր, պարսիկներ են ապրել: Կարճ ասած օտար մուսուլման ասպատակիչների համար թատերաբեմ է եղել և այն, ինչ-որ կար Երևանում աչքի լույսի պես պահպանել էր պետք: Այդ հուշարձաններն էին Հայաստանի անձնագիրը:

Հիմա ոչ միայն օտարերկրյա զբոսաշրջիկներին պետք է ապացուցենք, որ Երևանը 2700 տարվա բնակատեղի է, նաև խնդիր ունենք, մեր հարևան երկրին, ով առիթը բաց չի թողնում հիշեցնելու, որ Երևանը Ադրբեջանի մի մասն է: Ինչ է դուրս գալիս, որ Երևանի իշխանությունների շնորհիվ, ճարտարապետների ակտիվ մասնակցությամբ, մենք մեր հարևանին հրամցրեցինք նրանց քիմքին հարմար Երևան` մայրաքաղաք առանց պատմական հիշողության:

Իհարկե, այս ամենը 2000-ականներին արմատավորվեց, որը մեծ թափով ընթացավ նաև մեր օրերում:

Հիմա անդրադառնանք Տարոն Մարգարյանի խնդրին, նա ծանոթ էր, ինչպես յուրաքանչյուր հայ մարդ, թե Երևանի կենտրոնում ինչ է կատարվում: Տ. Մարգարյանի քաղաքապետության շրջանում ևս մշակութային ջարդը շարունակվեց: Մայրաքաղաքի իրացման ծրագրերը կառավարությունում ներկայացնում է հենց Տարոն Մարգարյանը: Եվ այսօր Տարոն Մարգարյանը հայտնություն է արել` քաղաքապետարանում քննարկման ժամանակ բարձրացրել է Երևանի պատմամշակութային շենքերի ժառանգության և դրանց պահպանման խնդիրը:
Անդրադարձել է «քաջ և նվիրված մեր երիտասարդներին», ովքեր փրկում են «Երևանի հին շենքերը» և «պայքարում են ամեն մի քարի պահպանման համար»:

Տարոն Մարգարյանը ձիով քայլ է արել, նախ առաջարկել է միջնորդ հանդես գալ, հետո մեղադրել է ճարտարապետներին, նրանից պահանջելով սրտացավություն, նրանք պետք է կառուցապատողից պահանջեն բացառել Երևանի արտաքին տեսքն աղավաղող և մայրաքաղաքի ճարտարապետությանը ոչ հարիր կառույցների նախագծեր պատվիրելը:

Նշենք, որ ճարտարապետները միշտ էլ գործիք են եղել, նրանց ձայնը որևէ տեղ լսելի չէ, նաև եթե ինչ-որ բան ստացել են, ապա համեմատած այն գումարների հետ, որ աշխատել է քաղաքապետարանի պաշտոնյաները և կառուցապատողները, մեկը թույլտվություններ տալու, մյուսները բնակիչներին թալանելու համար, անհամեմատելի է: Տարիներ առաջ Երևանի կենտրոնում պահպանված մշակութային հուշարձանի սեփականատերը մասնավոր զրույցում ասաց, որ Քաղաքապետարանի տարբեր աշխատակիցների 100 000 դոլար փող է տվել, որ կարողանա պետության կողմից պահպանվող իրենց ընտանեկան մշակութային հուշարձան-շենքը պահպանվի:

Իսկ այսօր Տարոն Մարգարյանը քաղաքապետարանում Ամերիկա է հայտնաբերում, մեղքը բարդելով գործիք-ճարտարապետների վրա, չէ որ ուժեղի մոտ միշտ էլ թույլն է մեղավոր: Է, որ ի՞նչ: Հայտնի է, որ լավագույն պաշտպանությունը հարձակումն է: Քաղաքապետը հարձակվում է, որ 2017թ-ին ՀՀԿ-ին ծվարեցնելով իր նկարի տակ փորձի նորից քաղաքապետ ընտրվել: Հիմա անգամ չի փրկի, եթե նույնիսկ Տարոն Մարգարյանը ծվարի մի չքաղաքականացված` ավելի կոնկրետ չհանրապետականացված նկարի տակ: