Ի՞նչ ուղերձ է քննարկվելու ԱԺ արտահերթ նիստում, որը ՔՊ-ն խոստացել է տապալել․ ուղերձի տեքստը
![Ի՞նչ ուղերձ է քննարկվելու ԱԺ արտահերթ նիստում, որը ՔՊ-ն խոստացել է տապալել․ ուղերձի տեքստը](/timthumb.php?src=disc/17-06-24/22d36639317cae660c3607c8090315b8.jpg&w=780)
Այսօր՝ հունիսի 17-ին, ժամը 18։30-ին տեղի ունենալու ԱԺ արտահերթ նիստ՝ «Կառավարության հրաժարականի և նոր կառավարություն ձեւավորելու անհրաժեշտության մասին» հարցը քննարկելու համար։
Հեղինակը խորհրդարանական ընդդիմությունն է։
«Քաղաքացիական պայմանագիր» խմբակցությունը հայտարարել է, որ մասնակցություն չի ունենալու նիստին։
Այնուամենայնիվ, հրապարակվել է նախագիծը, որը պետք է քննարկման է դրվի ԱԺ արտահերթ նիստում։
Ուղերձում նշվում է՝
Փաստելով, որ,
ԱԺ կողմից հավանության արժանացած Կառավարության 2021-2026թթ․ ծրագրի ամբողջական իրացումը ստանձնած գործող կառավարությունը ի վիճակի չէ կատարել իր հանձնառությունը։
Առաջացած մարտահրավերների հաղթահարումը վեր է ՀՀ իշխող կամ որևէ առանձին քաղաքական միավորի ուժերից։
ՀՀ-ին ուղղված լրջագույն սպառնալիքներին դիմագրավելու, հայրենիքի պաշտպանությունը կազմակերպելու համար պահանջվում է համահայկական ամբողջական համախմբում։
Արձանագրելով, որ
հրատապ անհրաժեշտություն է քաղաքական համաձայնությամբ, խաղաղ և անցնցում եղանակով ձևավորել հանրային հեղինակություն ունեցող, փորձառու անձանցից կազմված նոր կառավարություն, որն ամենասեղմ ժամկետներում կներկայացնի ստեղծված իրավիճակին համապատասխան նոր ծրագիր և կիրագործի երկրի դիմադրողականության մեծացմանը, պաշտպանության և անվտանգության ամրապնդմանը, տարածքային ամբողջականության ապահովմանն ուղղված ամբողջական քայլեր՝
Ազգային ժողովն ուղերձով դիմում է՝
ՀՀ կառավարությանը՝ վիճակով թելադրված ներկայացնել հրաժարական։
հանրությանը՝ ՀՀ-ում, և սփյուռքում զորակցել և սատարել նոր կառավարությանը և համախմբվել նրա շուրջ։