«Ճիշտ է, վիրավորներ ունեցանք, բայց զոհեր չունեցանք․ կիրառվել է միջոցների մի փոքրիկ մաս»․ Անդրանիկ Քոչարյանը գոհ է ոստիկանների աշխատանքից

Կիրառվել է ունեցած հատուկ միջոցների մի փոքրիկ մաս։ Այս մասին ԱԺ ճեպազրույցում ասաց ՔՊ-ական Անդրանիկ Քոչարյանը՝ անդրադառնալով հունիսի 12-ին ոստիկանների և քաղաքացիների միջև տեղի ունեցած բախումներին։

Նա վստահեցվում է, որ ոստիկանությունը մինչև վերջին պահը ձեռնպահ է մնացել հատուկ միջոցներ կիրառելուց։  Քոչարյանը պնդում է, թե իբր բախումը հրահրել է Բագրատ Սրբազանը։ Նա նաև վստահեցնում է, թե միայն լուսաձայնային միջոցներ են կիրառել, ու բեկորային հատուկ միջոցներ չեն կիրառվել։

Սա այն դեպքում, երբ ակցիայի մասնակիցները բեկորային վնասվածքներ են ստացել և կան փաստեր։ Բայց միևնույնն է՝ Անդրանիկ Քոչարյանը գոհ ու շնորհակալ է ոստիկաններին։

«Ճիշտ է, վիրավորներ ունեցանք, բայց զոհեր չունեցանք»,-ասաց Անդրանիկ Քոչարյանը՝ հավելելով, որ դրանով պետք է գնահատել ուժային կառույցների գործողությունները, որով կանխեցին հետագա զարգացումները։

Քաղաքացիների ստացած բեկորային վնասվածքների համար նա մեղավոր է համարում ցույցն առաջնորդողներին, ովքեր ցուցարարներին չեն բացատրել, որ կարող է հատուկ միջոցներ կիրառվեն և դրանցից հնարավոր են վնասվածքներ, եթե ճիշտ վարքագիծ չդրսևորեն։

«Հոգևորականը պետք է ասեր, որ կարող է կիրառվեն միջոցներ, որոնք այնուամենայիվ վտանգ են ներկայացնում իրենցից։ Ամբողջ աշխարհում է այդպես»,- ասաց Նիկոլ Փաշինյանի թիմակիցը։