«Հարկ վճարելուց խուսափել՝ նշանակում է գողանալ հանրային բարիքը»․ ֆիննախը խոստանում է պատժել հարկ չմուծողներին

ՀՀ ֆինանսների նախարար Վահե Հովհաննիսյանը պնդում է՝ հարկեր վճարելը ոչ միայն ֆինանսական կարիքները բավարարելուն կամ երկրի կառուցման գործում քաղաքացիների մասնակցության չափի մեծացմանն է ուղղված, այլև սոցիալ-տնտեսական արդարության վերականգնման նպատակ է հետապնդում:

Ըստ նրա, 0,7 տոկոսային կետով հարկեր-ՀՆԱ բարելավումը նաև հարկային վարչարարության մեծ ջանքերի արդյունք։

«Հարկայի վարչարարությունն ուղղված է ստվերի  կրճատմանը, ապահովում է  փողի կայուն ներհոսքը բյուջե, միաժամանակ վերականգնում, ուշքի բերում խաթարված արդարությունը»,-այս մասին նախարարը հայտարարեց Ազգային ժողովում ՀՀ 2023 թվականի պետական բյուջեի կատարման տարեկան հաշվետվության ներկայացման ժամանակ։

Նախարարի գնահատմամաբ, հարկերից խուսափող տնտեսվարողը ոչ պակաս մեղավոր է կոռումպացված պետական աշխատողից, իսկ քանի որ, նախարարի խոսքով, կառավարությունը խիստ պայքար է մղում պետական համակարգում կոռուպցիայի ցանկացած դրսևորման դեմ, ուստի նա խստացավ, որ կսահմանվեն պատիժներ՝ հարկերից խուսափելու համար։

«Հարկ վճարելուց խուսափել՝ ուղիղ իմաստով նշանակում է գողանալ հանրային բարիքը, լայն իմաստով նշանակում է վնասել տնտեսական գործունեություն իրականացնող մյուս քաղաքացիների ոգևորությունն ու  շարժառիթները, էլ ավելի լայն իմաստով խոչընդոտում է արդարության իրագործմանն ու հավասար հնարավորություններ ունենալու կենսական նախապայմանին»,- ասաց նա։