Ծեծողներին` կծեծենք. առևտրականներ. (տեսանյութ)

Այսօր առավոտից Մալաթիա տոնավաճառի մի քանի հարյուր առևտրականներ, երբ փակել էին  տոնավաճառի դիմաց գտնվող երթևեկելի հատվածը, ոստիկանությունը երթևեկելի հատվածը բացել էր, որի ընթացքում բերման է ենթարկվել տոնավաճառի երկու աշխատակից, ինչը հավաքվածների զայրույթն ավելի է բորբոքել: Առևտրականներից հատկապես կանայք Երևանի փոխոստիկանապես Վալերի Օսիպյանին զգուշացնում էին, որ եթե բերման ենթարկվածների նկատմամբ ֆիզիկական ուժ գործադրվի, իրենք կգնան ոստիկանություն և կծեծեն ծեծողներին:

Դրանից հետո Վալերի Օսիպյանը զանգ կատարեց և առևտրական կանանց տեղեկացրեց, որ բերման ենթարկվածները ազատ են արձակվել և նրանց մատով չեն կպել: Կանայք հորդորեցին Վալերի Օսիպյանին իրենց չհամոզել դադարեցնել բողոքի ակցիան, քանի որ անգամ բերման ենթարկվելու չեն վախենում, քանի որ առանց այն էլ ամեն օր առավոտից երեկո շուկայում բերման ենթարկվածի կարգավիճակում են:

«Գոմը սարքել ենք սուպերմարկետ, դեռ մի բան էլ մեզանից աստղաբաշխական գումարներ են ուզում»,- ասում են կանայք:

Առևտրականները հորդորեցին այն պաշտոնյաններին, ովքեր դղյակներում նստած հետևում են գործընթացին, քայլեր ձեռնարկեն իրավիճակը լուծելու համար, այլապես երկիրն ամբողջովին կդատարկվի:

Նշենք, որ Մալաթիա տոնավաճառի տնօրենն է նախկին պատգամավոր Սամվել Ավետիսյանին, ով ժամանակին ասել էր, որ տոնավաճառի աշխատողներին պարբերաբար հրահրում է պատգամավոր Սամվել Ալեքսանյանը (լֆիկ), որպեսզի ավելի լավ աշխատեցնի իր «Երևան Սիթին»:

Այս հարցում, նրան օգնում է գործող փոխքաղաքապետ Դավիթ Օհանյանը` Սամվել Ալեքսանյանի մտերիմ ընկերը, ով ժամանակին Մալաթիա-Սեբաստիա համայնքի թաղապետն էր: Այսօր Սամվել Ավետիսյանն ասում է, որ տոնավաճառի բողոքի ակցիան ևս հրահրվել է: Նրա խոսքով` հրահրողները եղել են այլ անձինք, ովքեր տոնավաճառի աշխատողներ չեն: Newspress.am-ի հարցին, թե այս անգամ էլ է Սամվել Ալեքսանյանը հրահրում, նա նշել է, թե ժամանակին իրեն ասել են, որ Սամվել Ալեքսանյանն է հրահրողը: Այս անգամ գիտի միայն, որ հրահրողներ կան, սակայն չգիտի Սամվել Ալեքսանյանն է կանգնած նրանց թիկունքում, թե ոչ:

Նա նշել է, որ եղել է դեպք, երբ նույնիսկ ուղորդել են տոնավաճառի աշխատողներին գնալ Բաղրամյան 26, ինչը զարմացրել է Սամվել Ավետիսյանին, քանի որ ինքը նախօրոք ասել է` կգնա զիջման, վարձավճարի չափն հասցնելով մինչև 100.000-ի: Սամվել Ավետիսյանը մտավախություն չունի, թե տոնավաճառը կփակվի, բայց եթե փակվի էլ` հաստատ պարապ չի մնա. «Փառք Աստծո, մի գործ կանենք»: