Արմեն Աշոտյանը կուսակցությունում լուրջ գործեր ունի

Կրթության և գիտոթյան արդեն նախկին Արմեն Աշոտյանն առաջիկա մեկ տարվա ընթացքում կուսակցությունում լուրջ գործեր ունի անելու։ Այդ մասին Գմ նիստից հետո լրագրողների հետ զրույցում ասաց Ազգային ժողովի փոխնախագահ Հերմինե Նաղդալյանը:

Նրա խոսքով` Հանրապետական կուսակցության Գործադիր մարմնի նիստում քննարկել են կոալիցիայի շրջանակներում ՀՅԴ-ի հետ աշխատելու սկզբունքները։  «Մենք նախեւառաջ պայմանավորվել ենք, որ պատրաստ ենք ականջալուր լինել իրար տեսակետներին, անգամ հակասություն ունենալու դեպքում քննարկումներ անել եւ գալ ընդհանուր հայտարարի։ Ամենակարեւորը՝ հանրային կյանքի խնդիրները ընդհանուր պատրաստակամությամբ եւ պատասխանատվությամբ լուծելն է»,- նշեց Նաղդալյանը։

Դիտարկմանը, թե ՀՅԴ-ն դեմ էր համայնքների խոշորացման ծրագրին, հաջողվե՞լ է նրանց արդյոք համոզել իշխանությանը հրաժարվել դրանից, Հերմինե Նաղդալյանը արձագանքեց, թե հնարավոր է իրենք են համոզել Դաշնակցությանը:

«Ես չասացի, որ որևէ մեկը կարողացել է որևէ բան համոզել: Եթե պայմանավորվել ենք համագործակցել` նշանակում է, որ պատրաստ ենք ականջալուր լինել միմյանց տեսակետների նկատմամբ, տարբերության դեպքում ընդհանուր եզրեր գտնենք: Դուք շտապեցիք եզրահանգման գալ՝ հնարավոր է, որ հակառակն է եղել»,- ասաց Նաղդալյանը: