ԿԳ նոր նախարարը` բիզնեսմեն, նախկին նախարարը` կուսակցական շինարար

ԿԳ նախարարների քարը ծանր է, բայց հոգին՝ թեթև: Այսպես թեթև հոգով Արմեն Աշոտյանը նախարարի իր ծանր քարով աթոռը հանձնեց ժամանակին այդ ծանրությանը վարժված` դաշնակցական Լևոն Մկրտչյանին: Արմեն Աշոտյանը ավելի քան յոթ տարի ղեկավարեց կրթության ու գիտության ոլորտը, այն բարեփոխեց, սերնդափոխեց այնքանով, որքանով ստացվեց մասնագիտությամբ բժիշկ Աշոտյանի մոտ: Այս տարիներին Աշոտյանի անունը որևէ բիզնեսի հետ չի առնչվել, ընդամենը Ավանում նախարարը հասցրել է ձեռք բերել մի հողակտոր, որի վրա շինարանություն դեռ չի հասցրել սկսել: Մինչդեռ, պատմաբան, արդեն հինգ անգամ ԿԳ նախարարի պաշտոնը ստանձնած Լևոն Մկրտչյանի անունը կապվում է լուրջ բիզնեսի հետ: Լևոն Մկրտչյանն ինքը չի հերքել, որ ազատագրված տարածքներում իր ընտանիքը ՀԷԿ-երի մասնաբաժին ունի: Ի դեպ, Արմեն Աշոտյանն ու Լևոն Մկրտչյանը մի տարբերություն էլ ունեն:

Լևոն Մկրտչյանը շատ լավ հարաբերություն կարող է ունենալ վարչապետ Հովիկ Աբրահամյանի հետ, ինչը չստացվեց Արմեն Աշոտյանի պարագայում: Չնայած այս պատմության մեջ մի բան կա, որ հաստատ Արմեն Աշոտյանի սրտով կլինի, հոգին էլ իսկապես թեթև կլինի. եթե ի պաշտոնե ամեն հինգշաբթի Արմեն Աշոտյանն էր գնում Հովիկ Աբրահամյանի նստավայր, ապա հիմա, ի պաշտոնե Հովիկ Աբրահամյանը կգնա Արմեն Աշոտյանի նստավայր`կառավարության հարևանությամբ գտնվող ՀՀԿ գրասենյակ, քանի որ նախկին նախարարը զբաղվելու է կուսակցական շինարարությամբ: