Հին Երևան նախագիծն էլ վերածում են մեծ առևտրային մոլի

2000-ականներին, երբ սկսեցին ակտիվորեն Երևանում ոչնչացնել 19-րդ դարից պահպանված հայկական ճարտարապետական և մշակութային հուշարձանները, որպես մանրոն, հանրությանը առաջարկվում էր Հին Էրիվան նախագիծը, որտեղ իմի էին բերվելու մշակութային վանդալիզմից պահպանված քարե պատառիկները:

Նշենք, որ այդ տարիներին, հանրության աչքերին թոզ փչելու համար հուշարձան-շենքերի քարերը համարակալվեցին: Ականատեսների վկայությամբ Արամի, Կողբացու, Բյուզանդի փողոցների մշակութային շենքերի քարերի զգալի մասը պարզապես այնպես են անհետացրել` հողով ծածկել են, որ առանց խուզարկու շան կամ հետաքննության հնարավոր չլինի գտնել: Պահպանվել են հուշարձան շենքերի քարերի չնչին տոկոսը, այն էլ եթե կառուցապատողը պատմականորեն խղճի մնացորդ է ունեցել, իսկ, հիմնական քարերը պարզապես ոչնչացված են:

Իսկ թե ինչպես են վերակառուցելու, եթե վերակառուցեն, Երևանի քաղաքաշինության նախարար Նարեկ Սարգսյանը մի արդարացնող բան կմտածի, ինչպես միշտ: Այսօր կառավարության նիստում, հերթական անգամ, Տարոն Մարգարյանի գլխավորությամբ, քննարկվեց Աբովյան, Փավստոս Բուզանդի, Եզնիկ Կողբացու և Արամի փողոցներով պարփակված տարածքների նկատմամբ բացառիկ՝ գերակա հանրային շահ ճանաչելու մասին նախագիծը:

Նշենք, որ կենտրոնի բնակիչներն արդեն նոր մահացու հիվանդությամբ են տառապում, որը կոչվում է հանրային գերակա շահ, քանի որ այս դեպքում հիվանդությունը օլիգարխիկ է, պետպատվեր չկա և ավարտը սպասելի` մահվան կամ արտագաղթի ելքով:

Ուղղակի զարմանալի է, որ այս տարածքներում դեռ մնացել է օտարելու որևէ կառույց, քանի որ եթե քաղաքապետարանը մայրաքաղաքի մյուս խնդիրներում երկու ոտքով թերանում է, քանի որ շահ չունի, հանրային գերակա շահի դեպքում քառատրոփ վազում է, քանի որ շահ ունի: Ի տարբերություն նախկին գերակա շահերի, այս նախագծում տվյալ տարածքների բնակիչների նույն տարածքում կառուցվող շենքերի բնակարան չեն հատկացնելու, քանի որ կառուցվելու են «առևտրային» շենքեր:

Եվ քանի որ վերջին տարիներին կամա-ակամա լսելի է դարձել հանրության բողոքը Երևանի կենտրոնի մշակութային վանդալիզմի հանդեպ, ապա կառուցելու են Հին Երևանը, բայց ոչ թե որպես 1000-ամյակների պատմություն ունեցող մայրաքաղաք Հին Երևան, այլ որպես Երևան մոլ: