Խոչընդոտելով Հայրապետի մուտքը Սարդարապատ՝ դուք մերժեցիք ինքներդ ձեզ իբրև հայ ազգի զավակներ

Հայ առաքելական եկեղեցու Մասյացոտնի թեմի առաջնորդ  Տ․ Գևորգ եպիսկոպոս Սարոյանի գրառումը․

Այսօր ծայրահեղ ամոթալի միջադեպ է տեղի ունեցել Սարդարապատի հուշահամալիրում։ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, Մայր Աթոռ Սուրբ Էջմիածնի միաբանության ուղեկցությամբ այցելել է հուշահամալիր, որտեղ ՀՀ ոստիկանության տարբեր ստորաբաժանումներ փորձել են խոչընդոտել Վեհափառ Հայրապետի մուտքը հուշահամալիր։ 

Սա թերևս ՀՀ Ոստիկանության պատմության ամենաամոթալի էջն է, որը մեզ հիշեցնում է Խորհրդային վարչակարգի կողմից Հայ Եկեղեցու և հայ հոգևորականի հանդեպ սանձազերծված բռնաճնշումները, և տրամաբանական շարունակության մեջ է 2018 թ. հակաեկեղեցական «Նոր Հայաստան նոր հայրապետ» շարժման հետ: Այդ օրերին նույնպես ՀՀ ոստիկանության թողտվությամբ շուրջ չորս օր գրավված մնաց Մայր Աթոռ սբ. Էջմիածնի դիվանատունը փողոցային խաժամուժի կողմից: Ոստիկանության պահվածքին «ամոթալի» բնորոշում տվել ենք նաև այդ օրերին՝ հիշեցնելով, որ օրենքի առաջ են կանգնելու բոլոր կամակատարները։ 

Այլևս ակնհայտ է, որ իշխող ուժի ղեկավարության հռչակած «Ժողովրդավարության բաստիոնը» շատ արագ վերածվում է բռնապետության: Ցավ է, որ ասվածը հաստատվում է նաև միջազգային համապատասխան կառույցների զեկույցներով և հատկապես երեկ ԱԺ պատգամավորի հանդեպ թույլատրված անմարդկային բռնությամբ: 

Սիրելի ոստիկաններ, Դուք ծառայում եք բացառապես օրենքին և ոչ թե անձերի քմահաճույքներին: «Սա մեր ծառայությունն է» ձևակերպումը չի կարող հակասել օրենքին, խախտել բոլոր տեսակի մարդկային և բարոյական նորմերը, առավել ևս դեմ գնալ ազգային-հոգևոր մեր արժեհամակարգին:

Խոչընդոտելով Վեհափառ Հայրապետի մուտքը Սարդարապատի հուշահամալիր՝ դուք մերժեցիք և՛ Ավարայրը և՛ Սարդարապատը և՛ ինքներդ ձեզ իբրև հայ ազգի զավակներ: Թե՛ հրաման տվողները և թե՛ հրաման կատարողներն այսօր պարզապես ուրացան սեփական ինքնությունը, վաճառեցին և՛ հայրենիքը և՛ ազգը և՛ պետականությունը: Սա գրեթե նույնն է, երբ Ադրբեջանը ոչնչացնում է Արցախի հոգևոր-մշակութային ժառանգությունը: 

Հարց տվեք ինքներդ ձեզ որքանո՞վ հայ գտնվեցիք այսօր, որքանո՞վ էր ազգային Ձեր կեցվածքը: Արտաքին թշնամին այդքան խորը չէր կարող վիրավորել մեր ազգային ինքնասիրությունը, որքան Դուք այսօր: 

Հասկացե՛ք, որ նույն ազգի զավակներն եք, նույն Եկեղեցու անդամները: Արդ՝ զգույշ եղեք աստվածամարտ և ազգադավ լինելուց: