ԵՏՄ երկրներից ներկրվող ավտոմեքենաների վրայից ԱԱՀ-ն կհանվի

ՀՀ կառավարությունն այսօրվա նիստում որոշում է կայացրել Եվրասիական տնտեսական միության (ԵՏՄ) անդամ երկրներից ֆիզիկական անձ հանդիսացող ՀՀ քաղաքացիների կողմից ներկրված մեքենաների՝ ավելացված արժեքի հարկով (ԱԱՀ) հարկման անցումային դրույթները վերացնելու վերաբերյալ:

Կարճ ասած, խոսքը վերաբերում է ԵՏՄ անդամ երկրներից ներկրվող մեքենաներին, որոնցից գանձվում էր ավելացած արժեքի հարկ, որը, ըստ ԵՏՄ կանոնադրության` չպետք է գանձվեր: Այս հարցը բարձրացրել էր ԵՏՄ ինտեգրման և մակրոտնտեսության հարցերով նախարար Տատյանա Վալովայան, նա հայտատարել էր, որ Հայաստանի` ԵՏՄ-ին անդամակցելուց հետո Ռուսաստանից Հայաստան ներկրվող մեքենաների համար քաղաքացիներից չպետք է ավելացված արժեքի հարկ գանձվեր:

ՀՀ ֆինանսների նախարարի տեղակալ Արմեն Ալավերդյանը պատասխանել էր Տատյանա Վալովայային, որ ԵՏՄ անդամակցության անցումային դրույթներով Հայաստանն իրավունք ունի ԵՏՄ երկրներից ապրանքներ ներմուծելիս ավելացված արժեքի հարկ գանձել:
«Ամեն ինչ արվել է պետական բյուջեի շահերից ելնելով՝ իրավական տողին, տառին համապատասխան: Դա մեր եկամտային կարևորագույն հոդվածներից մեկն է, եթե նայենք ԵՏՄ-ի օրենսդրությունը, ապա կարգավորումների մեջ Հայաստանի Հանրապետությունը ոչ մի խախտում չի արել»,- ասել էր փոխնախարարը:

Կառավարությունը իրավունք ուներ, թե չուներ, այնուամենայնիվ փափկեց:

Ազգային ժողովում քննարկեցին այս հարցը և ՀՀ ֆինանսների փոխնախարար Վախթանգ Միրումյանը հայտարարեց, որ ԵՏՄ երկրներից ավտոմեքենա ներմուծելու դեպքում ՀՀ-ում վճարելու է ԱԱՀ մինչև 2017 թ.-ի հունվարի 1-ը:

Այսօր կառավարությունը ամբողջովին էր փափկել: ՀՀ վարչապետ Հովիկ Աբրահամյանը կառավարության նիստի ժամանակ նշել էր, որ օրենքով նախատեսված էր ֆիզիկական անձանց կողմից ԵՏՄ-ից ներկրվող մեքենաների համար ԱԱՀ-ով հարկում չիրականացնել 2017-ից, սակայն, հաշվի առնելով վերջին շրջանում խնդրի քննարկման մասսայականությունը, ՀՀ նախագահի հետ որոշել են վերանայել ոլորտը կարգավորող օրենսդրությունն ու կրճատել օրենքի ուժի մեջ մտնելու ժամկետը:

«ԵՏՄ-ի համար խնդիրը նոր չէ. անցումային նման սահմանափակում ունեցել է նաև Ղազախստանը: Վերջին մեկ տարում Հայաստանն ակտիվ քննարկումներ է ունեցել ԵՏՄ երկրների իր գործընկերների հետ՝ առևտրի հիմնական խոչընդոտ հանդիսացող ԱԱՀ մեխանիզմների վերացման ուղղությամբ»,- ասել է վարչապետը:

Համապատասխան որոշման նախագիծը կառավարության կողմից ընդունվել ու ճանաչվել է անհետաձգելի՝ համապատասխան գերատեսչություններին երկու օր ժամանակ տալով վերջնական կարգավորումների հստակեցման համար:

Տարբեր գնահատականներ կան, թե այս ընթացքում որքան է գանձվել պետբյուջե ավտոմեքենաների ԱԱՀ-ի շրջանակներում: Թեև արդարացում են փնտրում, թե անցումային դրույթներով իրավունք ունեինք, սակայն ԵՏՄ ավելի քան հստակ է արտահայտվել, չպետք է գանձվեր ԱԱՀ և վերջ:
Ինչպես երևում է հայկական անցումային դրույթները չեն ընկալել, և քանի որ մեր բյուջեի նման ձևով համալրել ԵՏՄ սրտով չէ, ապա կառավարությունը որոշել է հապշտապ լուծել ԵՏՄ երկրներից ներկրվող ավտոմեքնաների վրայից ԱԱՀ-ն հանելու հարցը: