Կիրանցեցիներից ոմանք աննախադեպ ճնշումների պայմաններում համաձայն են փոխհատուցում ստանալ․ Գառնիկ Դանիելյան
«Այս օրերին Կիրանցի մեր հայրենակիցները, քույրերն ու եղբայարները ենթարկվում են աննախադեպ ճնշումների»։ Այս մասին ԱԺ-ում լրագրողների հետ զրույցում ասաց «Հայաստան» խմբակցության պատգամավոր Գառնիկ Դանիելյանը։ Նա հաստատեց, որ ճնշումների պայմաններում Կիրանցում կան բնակիչներ, որոնք համաձայն են փոխհատուցում ստանալ։
«Նրանց մոտ ստեղծում են մի իրավիճակ, որ այլևս ելք չկա, և որ ամենաճիշտ լուծումն առաջարկվող փոխհատուցումը վերցնելն է։ Պատահական չէր հայտարարությունը, թե Կադաստրի վկայականները խնդիր ունեն, ճիշտ չեն տրվել։ Այս օրերին ասել են, որ եթե հիմա հանգիստ, հանդարտ չվերցնեք այն, ինչ առաջրկվում է, վաղը դրանցի էլ կզրկվեք։ Նորից ահաբեկելով են ուզում ստիպել»,-ասաց նա։
Պատգամավորը նշեց, որ Կիրանցում ամեն մի բնակչի 10-15 չինովնիկ է ընկնում, որոնք ամենօրյա ռեժիմով սպառնում են, ճնշումների են ենթարկում․
«Պատահական չի, որ պատգամավորներին ու լրագրողներին չթողեցին ներս մտնել, այսինքն՝ տեռոր են իրականացնում և այդ տեռորի ընթացքում մարդիկ կլինեն, որ տեղի կտան, բայց մեծամասամբ տրամադրված են մինչև վերջ պայքարել»։