Սերժ Սարգսյան-Ռոբերտ Քոչարյան նոր ժամանակաշրջանը մեկնարկեց

Փետրվարի 24-ին ՀՀ նախագահի նստավայրում Հայաստանի Հանրապետական կուսակցության և Հայ Յեղափոխական Դաշնակցություն կուսակցության միջև կնքվեց քաղաքական համագործակցության համաձայնագիր: Փետրվարն ընդհանրապես Հայաստանի քաղաքական դաշտում ամեն անգամ մի նոր նշաձող է սահմանում` պայմանավորված նախագահ Սերժ Սարգսյանի փետրվարյան չսպասված ելույթներով:

Մեկ տարի առաջ նախագահի անսպասելի ելույթից քաղաքական նոր իրավիճակ ստեղծվեց ՀՀ-ում: Դե ֆակտո հանրապետության քաղաքական երկրորդ ուժը միանգամից վերածվեց ընդամենը մի քանի մանդատ ունեցող խմբակցության: Նախագահի այս տարվա փետրվարյան ելույթը մի նշանակետ ուներ, որ ինքը` Սերժ Սարգսյանը չի պատրաստվում հեռանալ և ինքն է թելադրելու խաղի կանոնները: Իսկ այդ խաղի կանոնների մեջ այս անգամ տեղավորվեց ՀՅԴ-ն: Սա նշանակում է, որ առաջիկա խորհրդարանական ընտրություններում շնորհիվ ՀՀԿ-ի` ՀՅԴ-ն ակամայից իր չորս պատգամավորով վերածվելու է քաղաքական երկրորդ ուժի:

Ոմանց կարծիքով Սերժ Սարգսյանն այս քայլով պարզապես Ռոբերտ Քոչարյանի «տակից տարավ դաշնակներին»: Բայց հետ հայացք ձգելով այդ կուսակցության 125-ամյա պատմությանը, ունենում ենք մի շատ պարզ պատկեր` Դաշնակցությունը հայ ազգի համար վճռորոշ պահին միշտ էլ «ԱԽՔ»-ացել է : Սակայն հիմա «ԱԽՔ»-ացումից բացի այլ խնդիրը էլ կա, այն է որ ՀՅԴ-ն Ռոբերտ Քոչարյանի տակից ամբողջովին դուրս չի գա, քանի որ երրորդ հանրապետության տարիներին հենց Ռոբերտ Քոչարյանն է եղել ՀՅԴ-ի միակ հովանավորն ու կնքահայրը, ուստի և Դաշնակցությունը հիմա դե ֆակտո երկու տիրոջ ծառա է ու չի բացառվում որ նախագահը ուժեղացնելով ՀՅԴ-ին` պարզապես ուժեղացնում է Ռոբերտ Քոչարյանին և սկիզբ է դրվում Սերժ Սարգսյան-Ռոբերտ Քոչարյան նոր ու ընդգծված ժամանակաջրջանին: