«Այվազյանը քո վարձու աշխատողը չի». Վարդան Այվազյանը` Հրանտ Բագրատյանին

«Ցույց տվեք ԵՏՄ շրջանակներում ստորագրված փաստաթղթի այն կետը, ըստ որի Հայաստանը պարտավորված է այլ երկների հետ առևտուր անելիս արտոնագիր տրամադրել»: ԱԺ-ում «Պետական տուրքի մասին» Հայաստանի Հանրապետության օրենքում լրացումներ կատարելու մասին նախագծի հարակից զեկուցող Վարդան Այվազյանին դիմեց պատգամավոր Հրանտ Բագրատյանը:

Վարդան Այվազյանն էլ հիշեցրեց, որ այդ փաստաթուղթը ԱԺ-ում են հաստատել: Նա ևս մեկ անգամ բացատրեց, որ ԵՏՄ համագործակցությունը պահանջում է արտոնագրի համար պետական տուրք սահմանել: Հայաստանն էլ այդ համագործակցության շրջանում սահմանել է ֆորմալ բազային դրույքաչափին հավասար գումար` 1000 դրամ:

Հրանտ Բագրատյանը, սակայն, կրկին պահանջեց փաստաթղթով ցույց տալ այդ կետը:

«Էսա, ընդմիջում ա լինելու, կգաք գնանք ցույց կտամ»,- ասաց Այվազյանը:

Սակայն Բագրատյանը չէր նահանջում: Նա պահանջեց այդ կետը ցույց տալ անհապաղ, ինչն էլ զայրացրեց Այվազյանին և հունից հանեց. «Այ քեզ բան, կետը ցույց տուր, էդ ահագին գիրքը հետս պետք ա բերեի, որ կետը ցույց տայի»,- ասաց Այվազյանը:

Բագրատյանը տեղից շարունակում էր իր պահանջը ներկայացնել: Նիստը վարող ԱԺ փոխխոսնակ Հերմինե Նաղդալյանը հորդորեց Այվազյանին ավարտել խոսքն ու Բագրատյանին նկատողություն արեց:

Չնայած դրան, Բագրատյանի և Այվազյանի միջև բանավեճը չէր ընդհատվում: Բագրատյանը որոշ փաստաթղթեր էր վկայակոչում, ինչին Այվազյանը արձագանքեց. «Դու դա Այվազյանին մի ցույց տուր, աշխատակազմին ցույց տուր: Այվազյանը քո վարձու աշխատողը չի», – նկտեց Այվազյանը:

Տնտեսական հարցերի մշտական հանձնաժողովի անդամ Բագրատյանն էլ իր ելույթի ժամանակ հայտարարեց, որ անձամբ հենց Այվազյանը լրիվ ավերել է տնտեսական դաշտը:

«Ես արդեն ստիպված հանձնաժողովի նիստերին չեմ գնում, որովհետև անիմաստ է գալ ու իրար վրա գոռալ: Գոռալով եք մատուցում ձեր նախագիծը»,- ասաց Բագրատյանը, ապա դիմեց Հերմինե Նաղդալյանին. «Բա դուք, տիկին Նաղդալյան, էդտեղ նստած դիտողություն եք անում, բա չեք ասո՞ւմ, որ փաստաթղթերը պատշաճ ձևով չեն մատուցված: Էդ դեռ հլա ռազբոռ կանենք, թե ինչի չէք կցել էդ փաստաթղթերը»:

Ըստ Բագրատյանի` այս փաստաթուղթը հերթական արգելք է ՀՀ առևտրատնտեսական հարաբերություններում: