ՀՀԿ-ում չգիտեն, թե ինչու է Մհեր Սեդրակյանը իրենցից դժգոհ

Հանրապետական Մհեր Սեդրակյանը լրատվամիջոցներին տված հարցազրույցներից մեկում, անդրադառնալով լրագրողի հետ տեղի ունեցած միջադեպին, նկատել է, որ դա կուսակից ընկերների կողմից իր դեմ կազմակերպված սադրանք է եղել:

Նա մատնանշել է այն, որ իշխանական կայքերն են անդրադարձել խնդրին: Մհեր Սեդրակյանը չի մանրամասնել, թե կոնկրետ ով է սադրել, սակայն նկատել է, թե «ով էլ կազմակերպում է, ամոթ իրեն, չի կարելի համ ընկերություն անել, համ ընկերոջը թիկունքից խփել»:

Հանրապետականներից newspress.am-ը փորձեց պարզել, թե ի՞նչ է նկատի ունեցել Մհեր Սեդրակյանը, և իրոք իրավիճակը կուսակցությունում այնքան լարված է, որ առիթ է տվել հանրապետական պատգամավորին նման հայտարարություն անել:

Սակայն, ՀՀԿ-ականներից մի քանիսն ընդհանրապես չպատասխանեցին զանգին, իսկ զանգին պատասխանողներից մի քանիսը, լսելով հարցը` անմիջապես ասացին, որ զբաղված են և չեն կարող խոսել, մյուսներն էլ` կծկտուր պատասխան տվեցին:

Մասնավորապես հանրապետական Հովհաննես Սահակյանն ասաց, թե չի կարծում, որ Հանրապետականում լարվածություն կա և չգիտի թե ինչու է Մհեր Սեդրակյանը նման հայտարարություն արել:

«Նոր եմ մտնում աշխատասենյակ: Մի հատ հասկանանք,թե ինչ հայտարարություն է արել, նոր կփորձենք մեկնաբանել»,-ասաց Սահակյանը:

Նկատենք, որ չի բացառվում, որ Մհեր Սեդրակյանը, «սադրիչ» ասելով, նկատի է ունեցել հանրապետականների երիտթևին: Հնարավոր է, որ ըստ նրա, իր «թիկունքից խփողները» ՀՀԿ-ի երիտասարդներն են:

Քանի որ, ոչ միայն Սեդրակյանին, այլև հանրապետականների ավագ սերնդի բոլոր ներկայացուցիչները վրդովվել են նախագահ Սերժ Սարգսյանի արված սերնդափոխության մասին հայտարարությունը և նրանցից ոչ-ոք չի ուզում իր տեղը զիջել երիտասարդներին: