Խորհուրդ ենք տալիս ԱԺ ամբիոնը պոպուլիստական և իրականությունից կտրված ելույթների համար չօգտագործել. Կապանի քաղաքապետը` ՔՊ-ական պատգամավորին

Կապան համանքի ղեկավար Գևորգ Փարսյանը ի պատասխան ԱԺ ՔՊ-ական պատգամավոր Մարինա Ղազարյանի հայտարարություն է տարածել, որում, մասնավորապես, ասվում է. 

«Նոյեմբերի 14-ի և ապրիլի 30-ի Ազգային ժողովի հերթական նիստերի ժամանակ, Սյունիքի մարզից ընտրված ԱԺ պատգամավոր Մարինա Ղազարյանը արդեն երկրորդ անգամ օգտագործելով երկրի բարձրագույն ամբիոնը, խոսում է Սզնակ և Դիցմայրի գյուղերի ջրամատակարարման խնդրի մասին՝ գաղափար չունենալով և չիմանալով  նշյալ խնդիրների լուծմանն ուղղված ո՛չ քայլերի հաջորդականության, ո՛չ առավել ևս իրականացված աշխատանքների մասին:

Ուստի, որպես համայնքի ղեկավար, հարկ եմ համարում տեղեկացնել Մարինա Ղազարյանին, որ մենք լիովին տիրապետում ենք թե՛ քաղաքի, և թե՛ 38 գյուղական բնակավայրերի առաջնահերթ լուծում պահանջող բոլոր խնդիրներին և Ձեր կողմից դրանց մասին մեզ հիշեցնելու անհրաժեշտություն բնավ չենք տեսնում։ Փոխարենը, խորհուրդ ենք տալիս ԱԺ ամբիոնը պոպուլիստական և իրականությունից կտրված ելույթների համար չօգտագործել և խնդիրը համակողմանի ուսումնասիրելուց և դրանում հավաստիանալուց հետո միայն պատասխանատվության սլաքները ուղղել Տեղական ինքնակառավարման մարմինների վրա:

Ի գիտություն ԱԺ պատգամավորին և մնացած հետաքրքրվող անձանց՝ ստիպված եմ քայլ առ քայլ ներկայացնել խնդրի լուծման իրական պատկերը.

Հաշվի առնելով սահմանամերձ և սահմանամերձ դարձած բնակավայրերի ռազմավարական նշանակությունը, կենսական պայմանների ապահովման  անհրաժեշտությունը և գյուղապահպանության խնդիրը` դեռևս 2022 թվականին Կապանի համայնքապետարանը նախաձեռնել է Դիցմայրի և Սզնակ գյուղերի ջրամատակարարման համակարգի բարելավման և Սյունիք, Դիցմայրի, Սզնակ, Բարգուշատ գյուղերի ոռոգման համակարգի կառուցման նախագծանախահաշվային փաստաթղթերի կազմման գործընթացը: Նախագծման աշխատանքների ավարտից հետո Կապան համայնքի ավագանին 2023 թվականի նոյեմբերի 22-ի N 123-Ա որոշմամբ համաձայնություն է տվել Համայնքների սոցիալական և տնտեսական ենթակառուցվածքների զարգացմանն ուղղված սուբվենցիոն ծրագրային հայտերին, այդ թվում՝ վերոնշյալ գյուղերի ոռոգման և խմելու ջրի համակարգերի կառուցման ծրագրերին։

Համայնքապետարանը ՀՀ կառավարության 2006 թվականի նոյեմբերի 16-ի N 1708-Ն որոշմամբ հաստատված ժամկետներում և կարգով՝ ավագանու կողմից հավանության արժանացած ծրագրերը ներկայացրել է ՀՀ Սյունիքի մարզպետի աշխատակազմ՝ Տարածքային կառավարման և ենթակառուցվածքների նախարարությանը ներկայացնելու նպատակով։

Համաձայն վերոնշյալ որոշմամբ հաստատված կարգի՝ ծրագրերը ներկայացվում են միջգերատեսչական հանձնաժողովի քննարկմանը՝ մինչև ընթացիկ տարվա փետրվարի 15-ը։ Սակայն, մինչ օրս, համայնքապետարանը ծրագրերի վերաբերյալ դրական կամ բացասական բնույթի  եզրակացություն չի ստացել: Այսինքն՝ սահմանված ժամկետները չեն պահպանվել:

Հետևաբար, եթե իսկապես ցանկանում եք համայնքային նշանակության որեւէ խնդրի լուծմանը աջակցել, ապա ցուցաբերեք կառուցողական և առարկայական մոտեցում, հակառակ դեպքում ձեր  կողմից Ազգային ժողովում մեր խնդիրները բարձրաձայնելու կարիքը մենք բացարձակապես չունենք: 
Հ․Գ․ Հորդորում ենք, այսուհետ պահպանել քայլերի հաջորդականությունը, չկրկնել Սզնակ գյուղի օրինակը և խնդրի մասին տեղեկատվություն ստանալու գրությունները համայնքապետարան ուղարկել նախքան Ազգային Ժողովի ամբիոնից ելույթ ունենալը»։