Մինչև ե՞րբ պետք է պետբյուջեն վճարի պաշտոնյաների սխալների համար

Վաղը կառավարության նիստի օրակարգում ընդգրկված է Մարդու իրավունքների եվրոպական դատարանի «Սաղաթելյանն ընդդեմ Հայաստանի» գործով (N 7984/06 գանգատ) 2015 թվականի հոկտեմբերի 20-ի վճռի պահանջները կատարելու որոշումը:
Կառավարությունը նախկին դատավոր Անահիտ Սաղաթելյանին պետք է վճարի 4.900 եվրո:

Որոշման նախագծում նշված է` վճռով սահմանված արդարացի հատուցման համար, որը ուղղակիորեն ասում է, որ Հայաստանում Անահիտ Սաղաթելյանի հետ անարդարացի են վարվել:

Նշենք, որ վերջին տարիներին Հայաստանը պետբյուջեից պատկառելի գումարներ է վճարում` ՀՀ քաղաքացիների նկատմամբ ապօրինությունների համար: Հիմնական բողոքները դատական համակարգից են:

Արդյոք այս խնդրի վերաբերյալ Արդարադատության նախարարությունում հետևությունե՞ր են անում: Եվրադատարանի որոշման հիման վրա վճարի ապօրինություն թույլ տրված անձը, նաև, պետբյուջեն չդառնա ապօրինությունների համար քավության նոխազ:

Նշենք, որ ՀՀ քաղաքացիները ՄԻԵԴ են կարողացել դիմել 2002 թվականից, երբ Հայաստանը վավերացրել է կոնվենցիան, իսկ 2007 թվականին նոր առաջին վճիռն է կայացվել: 2015 թվականի դեկտեմբերի 31-ի դրությամբ ընդդեմ Հայաստանի կայացվել է 60 վճիռ: ՄԻԵԴ կայացրած և վերջնական դարձած վճիռներով դիմումատուների կողմից պահանջվող շուրջ 15 մլն 36 հազար եվրոյից ՄԻԵԴ-ը բավարարել է մոտ 800 հազար եվրոյի պահանջը: