«Ինչպե՞ս կարող եք պահանջել ՀԱՊԿ-ից գործողություն այն դեպքերում, երբ Հայաստանի ղեկավարությունը ինքն է կոնկրետ բնակավայրեր Ադրբեջանին հանձնելու որոշում կայացրել»․ Մարիա Զախարովա

Ցավում ենք, որ ՀՀ իշխանությունները շարունակում են հրապարակայնորեն քննադատել ՀԱՊԿ-ը. քննադատել, իհարկե, կարելի է և պետք է, սակայն այս պարագայում խոսքն անհիմն քննադատության մասին է: Այս մասին ամենաշաբաթյա ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան:

«Եվ սա այն պարագայում, երբ ՀԱՊԿ քարտուղությունը հայտարարել է Երևանի նկատմամբ կազմակերպության կանոնադրության լիաժեք համապատասխանությամբ բոլոր պարտավորությունների պահպանման մասին»,- ասել է Զախարովան՝ ընդգծելով, որ երեք տասնամյակի ընթացքում կազմակերպությունն ապացուցել է իր արդյունավետությունն ու անկախությունը:

Ըստ նրա՝ ՀԱՊԿ-ին անդամակցելու հարցում Երևանի համար առավելություններից մեկն այն է, որ կազմակերպությունը լիարժեք հաշվի է առնում ազգային ինքնիշխանության գործոնը, չի ճնշում այն, ինչը որ բնորոշ է արևմտյան ռազամաքաղաքական դաշինքներին:

«Ոչ ոք կասկածի տակ չի առնում, որ ՀԱՊԿ պատասխանտվության գոտու մեջ է մտնում Հայաստանի տարածքը: Հայ-ադրբեջանական սահմանի պարագայում, ինչպես հասկանում ենք, և՛ Բաքվում, և՛ Երևանում համաձայնել են առաջնորդվել Ալմա Աթիի հռչակագրով: ՀՀ ղեկավարությունն ինքն է խոստովանում, որ սահմանազատման շուրջ բանակցությունների շրջանակում պետք է հստակեցնել սահմանը և նաև խոստովանում է, որ պետք է լուծվեն վիճելի տարածքների, անկլավների հետ կապված հարցերը: Եվ ուրեմն ինչպե՞ս կհրամայեք ՀԱՊԿ-ին գործել այն դեպքերում, երբ հենց ՀՀ ղեկավարությունն է որոշել մի շարք բնակավայրեր Ադրբեջանին փոխանցել, թե՞ այստեղ էլ է ՀԱՊԿ-ը մեղավոր»,- ասել է Զախարովան: