«Կենտրոն մաքրություն»-ը դեռևս պարտք է նախկին աշխատակիցներին

«Կենտրոն մաքրություն» փակ բաժնետիրական ընկերությունը լուծարումից հետո դեռևս պարտք է մնացել աշխատակիցներին: Նրանցից Անդրանիկ Բադալյանը փոստով ստացել է, որ իր և «Կենտրոն մաքրության» միջև կնքված աշխատանքային պայմանագիրը լուծարվել է:
Newspress.am-ին Անդրանիկ Բադալյանը պատմեց, որ դեռևս ընկերությունը իրեն և որդուն` Գեղամին, պարտք է մնացել, ըստ իր հաշվարկների, մոտ հազար դոլարի չափ:

Աշխատակցիներին միանգամից ասել են՝ չեք աշխատելու և վերջ, տվել են մեկ ամսվա աշխատավարձը, իսկ վերջնահաշվարկը չեն տվել, նաև որդուն վերջնահաշվարկ չեն տվել:

Ըստ նրա, վերջնահաշվարկ չեն ստացել «Կենտրոն մաքրություն» ընկերության նախկին աշխատակիցների գրեթե կեսը:

«Մարդ կա միլիոն ունի ստանալու, չի ստացել: Էս տարիների ընթացքում արձակուրդային ոչ մեկին չեն տվել»,-նշեց մեր զրուցակիցը:

Իսկ երբ պատրաստվում էին բողոքել, ընկերությունից խոստացան վճարել և մի փոքր մասը վճարեցին, որ չբողոքեն:

«Առաջինը կանանց փողը տվեցին, հավաքարարներին, նաղդ իրանք էին բողոքողը, վերջնահաշվարկ էլ տվեցին, հետո նոր տղամարդկանց: Հիմա չգիտենք, բողոքենք, ինչ անենք: Պարտքեր ունեմ, որ պիտի տամ, չգիտեմ ոնց եմ տալու, գոնե վերցնեին աշխատանքի, էդ էլ չարեցին, ասում են` տեղ չկա: Ոչ մեր փողն են տալիս, ոչ էլ գոնե վերցնում են աշխատանքի»,- ասում է Ա. Բադալյանը:

Սանիտեկում, ըստ նրա, աշխատում են «Կենտրոն մաքրություն» ընկերության մոտ տասը աշխատակից, մնացածին ասել են, որ աշխատանքի տեղ չկա:

Նշենք, որ «Կենտրոն մաքրություն» ընկերության աշխատակիցներին 2014 թ-ի դեկտեմբերի 1-ին հայտնել են, որ իրենք ազատված են աշխատանքից: «Կենտրոն մաքրություն» ԲԲԸ-ն լուծարվել է Երևանի Կենտրոն համայնքի աղբահանությունը լիբանանյան «Սանիտեկ» ընկերությանը փոխանցելուց հետո: Ընկերությունը գործազուրկ դարձած 170 աշխատակիցներին պարտք էր մնացել 75 մլն դրամ: