Սերժ Սարգսյանը հսկելու է ԱԳՆ-ի աշխատանքը

Արտակարգ եւ լիազոր դեսպան Արման Նավասարդյանը դրական է գնահատում արտաքին տնտեսական կապերի հարցերով փոխարտգործնախարարի պաշտոն ստեղծելու մասին Սերժ Սարգսյանի հայտարարությունը:

«Կարծում եմ, որ դա ճիշտ և ժամանակին արված որոշում է»,- newspress.am-ի հետ զրույցում ասաց Արման Նավասարդյանը:

Նրա դիտարկմամբ` դիվանագիտությունը զուտ քաղաքական հարցերով զբաղվելուց բացի, անպայման պետք է զբաղվի նաև տնտեսական համագործակցության խնդիրներով ու բոլոր այն հարցերով, որոնք առնչվում են երկրի ներքին քաղաքականությանը: Ըստ նրա` Հայաստանը տնտեսության հետ կապված մեծ խնդիրներ ունի, իսկ այս տարբերակը կոչված է այդ խնդիրնեը լուծելուն:

«Դա վաղուց պետք է լիներ, քանի որ զուգահեռ գոյություն չունի արտաքին տնտեսական կամ առևտրի նախարարություն. ինչպես դա կա որոշ երկրներում: Բայց կարևոր է, որ այնտեղ լինի փորձված մարդ»,- նկատեց արտակարգ և լիազոր դեսպանը:

Նրա կարծիքով ԱԳՆ-ն, միջպետական հարաբերություններում, պետք է կենտրոնացնի նաև իր բոլոր մյուս ուղղությունները: Ասել է` թե ֆինանսների, թե առևտրի, թե գիտության, թե տեխնիկայի կամ այլ ուղղություներով հարաբերությունները պետք է կենտրոնացնի ԱԳՆ-ն: Արման Նավասարդյանի խոսքով` ճյուղային նախարարություններն արտաքին համագործակցության առումով աշխատում են «ոչ արդյունավետ և ոչ լիարժեք»:

Մյուս կողմից էլ, ըստ Նավասարդյանի, եթե դիվանագիտությունը չունի հաշվետվության մեխանիզմ` աշխատանքն արդյունավետ չի կարող լինել:

Նա մատնանշում է ամերիկյան օրինակը, ըստ որի, եթե պետական պայմանագրերի ստորագրման 25 տոկոսը իրագործվում է` դա արդեն լավ է:

«Մենք չգիտենք, թե պայմանագրի կատարողականության մասով Հայաստանում քանի տոկոսն է իրագործվել. այսինքն, եթե այնտեղ աշխատող դեսպանը կամ դիվանագետը ընդունեց որոշում, պայմանգիր ստորագրեց, պետք է գա և հաշվետվություն տա, թե դրա որ տոկոսը կատարվեց: … ու, երբ նախագահն ասում է, որ պետք է հսկողություն լինի` նա հենց դա նկատի ունի»,-եզրափակեց դեսպանը: