Ապրիլի 22-24-ին Ջորջ և Ամալ Քլունիները կլինեն Հայաստանում

Հոլիվուդյան դերասան Ջորջ Քլունին իր հայտնի փաստաբան կնոջ՝ Ամալ Քլունիի հետ ծրագրել է ապրիլի 22-24-ը այցելել Հայաստան՝ մասնակցելու Հայոց ցեղասպանության հիշատակի միջոցառումներին։ Այս մասին հայտնում է armenianagenda.com-ը։

Ջորջ Քլունին, ով նաև Not On Our Watch բարեգործական հիմնադրամի համահիմնադիրն է, կներկայացնի գործարար Ռուբեն Վարդանյանի ջանքերով իրականացված «100 կյանք» նախաձեռնության «Ավրորա» մրցանակը Հոլոքոստը վերապրած, Նոբելյան դափնեկիր Էլի Վիզելի հետ։ Մրցանակը, որն ուղղված է մարդկության զարթոնքին, կշնորհվի ապրիլի 24-ին, Երևանում։

Մրցանակը կշնորհվի ամեն տարի։ Կպարգևատրվեն անհատներ, որոնց գործողությունները բացառիկ ազդեցություն են ունեցել մարդկային կյանքերի պահպանման համար։ «Ավրորա» մրցանակի հետ կտրամադրվի 100 հազար դոլար դրամական պարգև։ Անհատը կընտրի իրենց աշխատանքը ոգեշնչած կազմակերպությանը, որը կստանա 1 մլն դոլար դրամաշնորհ։

«Անձնազոհության, քաջության, ուժի և առատաձեռնության պատմությունները խոնարհեցնում են մեզ»,- ասել է Ռուբեն Վարդանյանը։ «Այն, ինչ մենք ստացել ենք, ապացույցն է առ այն, որ աշխարհը լի է ոգեշնչող ու արժանի անհատներով»,- ասել է մրցանակի համահիմնադիրը։