Նիկոլ Փաշինյանի աջակցությունը ՀՀԿ թեկնածուին

Այսօր խորհրդարանում քննարկվում էր Հանրապետկանների կողմից առաջադրված ՄԻՊ թեկնածու Արման Թաթոյանի հարցը: Հետաքրքիր էր ԱԺ ՀԱԿ խմբակցության պատգամավոր Նիկոլ Փաշինյանի հայտարարությունը: Վերջինս ասաց, որ իր համար օմբուդսմենի նախընտրելի թեկնածուն Զարուհի Փոստանջյանն էր, բայց վերջնական որոշել է, որ կողմ է քվեարկելու Թաթոյանի թեկնածությանը. «Սա ավելի շատ պոստ ֆակտում վստահության քվե է ՀՀ-ում Մարդու իրավունքների պաշտպանության ինստիտուտին»,-մանրամասնեց նա:

ԱԺ ԲՀԿ խմբակցության ղեկավար Նաիրա Զոհրաբյանն էլ ասաց, որ ԲՀԿ խմբակցության պատգամավորներն ազատ են իրենց քվեարկության հարցում, իսկ ինքը չի մասնակցի քվեարկությանը:

«Եթե կայացնեք այս ինստիտուտը՝ ես կլինեմ առաջին մարդը, որ կկանգնի ձեր կողքին՝ ասելով, որ կոտրեցիք այդ ստերեոտիպը տուրք չտալով ընդդիմության կամ իշխանության պահանջներին, չդառնալով նրանց պատանդը կամ գերին»,-շեշտեց պատգամավորը:

Նշենք, որ երկրորդ ընդմիջումից հետո ՄԻՊ թեկնածուի հարցը ԱԺ-ում քննարկվում էր կիսադատարկ դահլիճում: Հետաքրքիր է, որ դահլիճում ներկա էին նաև պատգամավորների շարքում էին նաև Նիկոլ Փաշինյանը և Գագիկ Ջհանգիրյանը: Հիշեցնենք նաև, որ թեև Ջհանգիրյանը հայտարարել էր, որ ՄԻՊ թեկնածու չեն առաջադրում, ոչ ոքի չեն սատարելու, բայց այսպես ասած գովազդել էր Արման Թաթոյանին, հայտարարելով, որ ինքը՝ Մարտի 1-ի գործով հանիրավի դատապարտված անձ, կարող է ասել, որ Արման Թաթոյանը որևէ բացասական դերակատարում չի ունեցել Մարտի 1-ի իրադարձությունների գործում, ընդհակառակը՝ այն ժամանակ լինելով Մարդու իրավունքների պաշտպանի գրասենյակի աշխատակից, մասնակից է եղել այդ իրադարձությունների վերաբերյալ զեկույցը կազմելուն:

Զարուհի Փոստանջյանն էլ արձագանքել էր, որ եթե Ջհանգիրյանին դուր է եկել Մարտի 1-ի իրադարձությունների մասով Մարդու իրավունքների պաշտպանի կազմած զեկույցը, որին մասնակցություն է ունեցել Արման Թաթոյանը, ապա դրանով Ջհանգիրյանը ընդունում է, որ ինքը ոչ թե քաղբանտարկյալ է, այլ սովորական կրիմինալ: