Ինչպես և որտեղ է հայտնաբերվել 36 կիլոգրամ գողացված ոսկին, ինչ կապ ունի Զապի փեսան․ բացառիկ տեսանյութ և էքսկլյուզիվ մանրամասներ զինված հարձակումից

NEWSPRESS.am-ին բացառիկ մանրամասներ են հայտնի դարձել ապրիլի 10-ին տեղի ունեցած աղմկահարույց զինված հարձակման և 36 կիլոգրամ ոսկու գողության դեպքին հաջորդած իրադարձությունների մասին։  

Մեր ձեռքի տակ է հայտնվել բացառիկ տեսանյութ, որում երևում է, թե ինչպես են հայտնաբերում ապրիլի 10-ի առավոտյան գողացված 36 կիլոգրամ ոսկին։

NEWSPRESS.am-ի տեղեկություններով՝ ոսկին հայտնաբերել են Արարատի մարզում, այն, նախնական տեղեկություններով, ցանկացել են Սյունիքի մարզի Մեղրի քաղաքով տեղափոխել Իրանի Իսլամական Հանրապետությունը, ինչը, փաստացի, ձախողվել է։

Ապրիլի 11-ին տեղեկություն տարածվեց այն մասին, որ Արմավիրի մարզում ավազի մեջ կիսաթաղված վիճակում հայտնաբերվել է Porsche Cayenne ավտոմեքենա, որով, կրկին նախնական կասկածով, կատարվել էր զինված հարձակումը։ 

NEWSPRESS.am-ին հայտնի է դարձել, որ ավազի հանքը, որտեղ հայտնաբերվել է հիշյալ մեքենան, գտնվում է Արմավիրի մարզի Մերձավան համայնքում և պատկանում է «Զապ» մականունով հայտնի Անդրանիկ Սողոյանի փեսային։ 

Մեզ հայտնի է դարձել նաև, որ այս գործով արդեն իսկ երկու ձերբակալված կա, նրանցից մեկը Դիլիջանից է։ 

Հիշեցնենք, որ Քննչական կոմիտեից ավելի վաղ հայտնել են, որ ապրիլի 10-ին՝ ժամը 07:55-ին, քաղաքացուց ահազանգ է ստացվել այն մասին, որ իր ազգականների վրա տեղի է ունեցել զինված հարձակում և նրանց թալանել են: Դեպքի վայրում հայտնաբերվել է «Հունդաի Սոնատա» մակնիշի ավտոմեքենա, իսկ մայթեզրին գտնվել են 3 անձ, որոնց ձեռքերին ամրակցված են եղել ձեռնաշղթաներ։ Նախնական տեղեկություններով՝ զինված անձինք արցունքաբեր գազ կիրառելով՝ երեքին էլ նստեցրել են ավտոմեքենան, հափշտակել բեռնախցիկում գտնվող ճամպրուկների և պայուսակների մեջ եղած մոտ 1 միլիարդ 24 միլիոն ՀՀ դրամ գումարին համարժեք, շուրջ 36 կիլոգրամ ոսկյա երեք ձուլակտորներ, մոտ 1 միլիարդ 216 միլիոն ՀՀ դրամին համարժեք 293 միլիոն ռուբլի գումարը և դիմել փախուստի: