Մարդիկ գիտեին՝ կոնկրետ որտեղ կարկուտ է գալիս՝ այնտեղ ցորեն էին ցանում․ ժողովուրդ ջան, կարող է դուք պետք է գնաք, նստեք, ասեք՝ վայ, կարկուտ ջան, արի, մենք էլ դրա համար պետք է վճարենք. Փաշինյան

էկոնոմիկայի նախարար Գևորգ Պապոյանը զեկուցելով «Հայաստանի Հանրապետության կառավարության 2019 թվականի հոկտեմբերի 24-ի N 1485-Լ որոշման մեջ փոփոխություններ և լրացումներ կատարելու մասին» որոշումը՝ նկատեց, որ 2023 թվականին ապահովագրվել էին ծիրան, խաղող, դեղձ, սալոր, խնձոր, կեռաս, բալ, ձմերուկ, սեխ, կարտոֆիլ, աշնանացան/գարնանացան ցորեն, գարի և վարսակ մշակաբույսերը։

«Ապահովագրվող ռիսկերն էին՝ գարնանային ցրտահարությունը, երաշտը, կարկուտը և հրդեհը»,- ասաց Պապոյանը։

Նա նաև տեղեկացրեց, որ ապահովագրական ընկերությունների մասնակցության համար առաջարկվում է, որ այս տարի կառավարությունը, բացի ապահովագրավճարի սուբսիդավորումից, մասամբ կիսի ապահովագրական ռիսկը, այսինքն՝ աջակցի ապահովագրական ընկերություններին ապահավագրության շեմը որոշակի գերազանցելու դեպքում փոխհատուցում տրամադրելու միջոցով։

Նիկոլ Փաշինյանը հետաքրքրվեց, թե ինչու է փոխվել ապահովագրման ենթակա  մշակաբույսերի ցանկը, արդյոք ցրտահարություն չի լինելու։

Պապոյանը հույս հայտնեց, որ ցրտահարություններ չեն լինի։ 

«Ցորենն ինչո՞ւ կարկուտից չեն ապահովագրում։ Մենք տեղեկություններ ունեինք, որ մարդիկ գիտեին՝ կոնկրետ այս վայրում միշտ կարկուտ է գալիս, գնում՝ այնտեղ ցորեն էին ցանում, որ ծեծի, իրենք էլ ապահովագրություն ստանային»,- ասաց Փաշինյանը։

Ըստ Փաշինյանի՝ ապահովագրական ընկերություններն իրենց ապահով են զգացել, քանի որ կառավարությունը իրենց ապահավագրության կեսը տվել է։

«Վերաապահովագրողը, որը օտարերկրյա կազմակերպություն է, ասել է՝ ժողովուրդ ջան, կարո՞ղ է դուք պետք է գնաք նստեք, ասեք՝ վայ, կարկուտ ջան, արի, կարկուտ ջան արի, մենք էլ դրա համար պետք է վճարենք։ Չի լինի նման բան»,- ասաց նա։