Արարատ Միրզոյանը Նիկոլ Փաշինյանից ավելի Նիկոլ է գտնվել

«Հրապարակը» գրում է.

«Նիկոլ Փաշինյանը Հայաստանը վերածել է բաց երկնքի տակ գժանոցի ու իր քայլերով փորձում է խելագարության հասցնել այս իրավիճակից դեռեւս չգժված մեր քաղաքացիներին։ Շուրջ մեկ ամիս է՝ պետության թիվ մեկ պաշտոնյան Տավուշից հողերի հանձնման հարցը ներքաղաքական օրակարգ բերելով` ժողովրդին պահում է ահուսարսափի մթնոլորտում։ Մարտի 18-ին այցելելով Տավուշի համայնքներ՝ նա բնակիչներին գուժեց հողեր հանձնելու մասին` դա փաթեթավորելով սահմանազատման գործընթացի շղարշի ներքո եւ փորձելով համոզել, որ դրանք ադրբեջանական տարածքներ են, ուստի պետք է հանձնվեն:

Մինչդեռ անտեսեց այն, որ այդ տարածքները հանձնելով՝ հանձնում է միջպետական ճանապարհը,  գազամուղը, հայկական բարձրադիր պաշտպանական դիրքերը, եւ ընդհուպ Լոռին դառնալու է սահմանամերձ մարզ։ 

Տավուշցիները կոշտ դիմադրություն ցուցաբերեցին, եւ Փաշինյանը բացահայտորեն սպառնաց՝ եթե չորս գյուղերը չհանձնենք, շաբաթվա վերջին Ադրբեջանը պատերազմ կսկսի։ Շաբաթն անցավ, պատերազմը չեղավ, բայց Տավուշում կյանքը վերածվել է դժոխքի․ մարդիկ կորցրել են քունը, ինքնապաշտպանության են պատրաստվում: Փաշինյանի հայտարարությունը պարալիզացրել է ողջ երկիրը։ Փաշինյանին սկսեցին ձայնակցել իր անհայրենիք նազիր-վեզիրները, որոնք ամեն կերպ փորձում են բացատրել, թե ինչու է Տավուշից սկսվելու սահմանազատումը, եւ ինչու է Հայաստանը որոշել առանց նախապայմանների հանձնել տարածքներ: Անդրանիկ Քոչարյանը մինչեւ անգամ շտապեց հայտարարել, թե ԶՈՒ գլխավոր շտաբն է որոշել՝  սահմանազատումը սկսել Տավուշից։ Ավելի վաղ սահմանազատման հարցերով հանձնաժողովի անդամ, փոխվարչապետ Մհեր Գրիգորյանի գրասենյակից հայտարարեցին, թե որոշում չկա սահմանազատումը սկսել Տավուշից: Պարզ ասած՝ իշխանականներն իրենց հակասական հայտարարություններով երկիրը կատարյալ Սոդոմ-Գոմորի վերածեցին։ Եվ ընդդիմությունը սահմանազատման-սահմանագծման հարցերով հրատապ նիստ հրավիրելու նախաձեռնությամբ հանդես եկավ: Նիստը կայացավ երեկ: Չնայած ընդդիմադիրները պնդեցին, որ հանրային հետաքրքրություն ներկայացնող հարցեր են նիստի օրակարգում, ուստի պետք է բաց անցկացնել, որ հանրությունն էլ տեղեկանա՝ ինչ է կատարվում, բայց խորհրդարանական մեծամասնությունը որոշեց նիստը փակ ընթացակարգով անել։

Ընդդիմադիր «Հայաստան» խմբակցության քարտուղար Արծվիկ Մինասյանը քվեարկությունից առաջ հայտարարեց, որ իրենք գաղտնի տվյալների հրապարակում չեն կանխատեսում, ու, իրենց կարծիքով, փակ անելը կնշանակի հանրությունից թաքցնել կարեւոր մանրամասներ։ Պատգամավոր Գեղամ Մանուկյանն էլ ավելացրեց, որ դահլիճում բոլորն ունեն բջջային հեռախոսներ, ու եթե մտահոգությունը հակառակորդի չլսելն է, ապա այդ հեռախոսների միջոցով գաղտնալսվելու վտանգը միշտ կա։

Արդյունքում որոշվեց, որ ոչ միայն դռնփակ պետք է տեղի ունենա նիստը, այլ նաեւ պատգամավորները պետք է հանձնեն հեռախոսները։ Ի դեպ, ԱԺ նախագահը կամայական որոշում է կայացրել, որ նիստին ներկա չպետք է գտնվեն ՔՊ խմբակցության նորընտիր պատգամավորն ու ընդդիմադիր 9 պատգամավորներ, այդ թվում՝ Սեյրան Օհանյանը, Լեւոն Քոչարյանը, Արմեն Ռուստամյանը, Արմեն Գեւորգյանը, Ասպրամ Կրպեյանը եւ այլք, ովքեր չունեն գաղտնի տեղեկատվությանը ծանոթանալու իրավունք։ Իսկ նման իրավունք չունեն, որովհետեւ նրանց նկատմամբ քրեական շինծու գործեր կան հարուցված:

Նիստը, որին մասնակցում էին Արարատ Միրզոյանը եւ Մհեր Գրիգորյանը, տեւեց մոտ 2 ժամ, սակայն մենք տեղեկացանք, որ իրականում որեւէ գաղտնի տեղեկատվություն չեն հայտնել։ Ընդդիմության դիրքորոշումները ներկայացրել է «Հայաստան» խմբակցության պատգամավոր Արթուր Խաչատրյանը, ով շեշտել է, որ չպետք է սահմանազատման գործընթացը միակողմանի լինի, սակայն փոխվարչապետ Մհեր Գրիգորյանը հայտարարել է, որ, ըստ էության, նման գործընթաց չի էլ սկսվել։ Գրիգորյանի փոխանցմամբ՝  կարեւորագույն սկզբունքների շուրջ պաշտոնական Երեւանի եւ Բաքվի միջեւ չկա կոնսենսուս՝ անվտանգության, սոցիալ-կենցաղային եւ իրավական հարցերի շուրջ, ուստի վաղ է խոսել սահմանազատման գործընթաց սկսելու մասին։ Ավելի շատ իրավական հիմնավորումներ է ներկայացրել, թե ինչն են դիտարկել գործընթացի համատեքստում, ինչպես են պատկերացնում պրոցեսը, բայց շեշտել է, որ որեւէ հարցում որոշում չեն կայացրել։

Ընդդիմադիրները հարցրել են՝ այդ դեպքում ինչո՞ւ էր Փաշինյանն ահաբեկում տավուշցիներին, ասելով՝ եթե չհանձնենք, շաբաթվա վերջում Ադրբեջանը հարձակում կսկսի։ Ո՛չ Մհեր Գրիգորյանը, ո՛չ Արարատ Միրզոյանը հստակ պատասխան չեն տվել դրան, փորձել են շրջանցել, իսկ երբ ընդդիմադիրները շարունակել են պնդել, ՔՊ-ական պատգամավորները տեղից դիմել են իրենց հոգեհարազատ ոճին՝ ասելով, թե իբր Փաշինյանը նման հայտարարություն չի արել։

Ընդդիմադիրներին ապշեցրել է արտգործնախարարի վախվորած պահվածքը: Արարատ Միրզոյանը, ընդդիմադիրների տպավորությամբ՝ եկել է շարունակելու Նիկոլ Փաշինյան գիծը, որ եթե չկատարենք Ադրբեջանի պահանջները, ապա պատերազմն անխուսափելի է լինելու։ Ասել է՝ իբրեւ իրենք էլ են ուզում, որ ամեն ինչ լավ լինի, բայց Ադրբեջանին չեն կարողանում կառուցողական դաշտ բերել, եւ մեր պետության վիճակի չափազանց տխուր ախտորոշում է տվել, թե՝ մեղմ է ասել, որ ամեն ինչ շատ վատ է, Ադրբեջանը չի ընդունում խաղաղության պայմանագրի վերաբերյալ պաշտոնական Երեւանի որեւէ կառուցողական առաջարկ, ինչ ներկայացնում ենք, տրամագծորեն հակառակ պատասխանն ենք ստանում, ուստի Միրզոյանը պատերազմի վտանգն առավել քան հավանական է համարել։ Հարցրել են՝ ո՞րն է այս իրավիճակից ելքը, Միրզոյանն անհոդաբաշխ, մանվածապատ պատասխաններ է տվել, թե պետք է այնպիսի լուծում գտնել, որ Ադրբեջանին հունից չհանենք եւ այլն։

Ի դեպ, ՔՊ-ականները ներկայիս իրավիճակն էլ են փորձել բարդել նախկինների վրա, ասելով՝ եթե ժամանակին չընդունեին Վարչատարածքային բաժանման մասին օրենքը ու չճանաչեին ՀՀ սահմանները, ապա այսօր այս իրավիճակում չէինք հայտնվի։ Մասնավորապես Մարիա Կարապետյանը, Թագուհի Ղազարյանը բառացի ընդդիմությանն ասել են, որ հենց դուք եք մեղավոր, որ այսօրվա իշխանությունը ստիպված է հողեր տալ Ադրբեջանին։

ՀԳ․ Նկատենք, որ խորհրդարանում փակ նիստեր էլի են արվել, ասենք` ԱԱԾ տնօրենի եւ Գլխավոր շտաբի պետի մասնակցությամբ, որտեղ պետության անվտանգության եւ պետական գաղտնիք պարունակող թեմաներ են արծարծվել, սակայն ընդդիմադիր պատգամավորների նկատմամբ նման վերաբերմունք չի դրսեւորվել` նրանք միշտ մասնակցել են փակ նիստերին։ Ավելին, նույն Ասպրամ Կրպեյանը մի քանի անգամ ԱԳՆ-ում ծանոթացել է խաղաղության պայմանագրի հետ կապված փաստաթղթերին, որոնք եւս գաղտնիք են պարունակում»։