Կարծում եմ՝ բարձրաստիճան ղեկավարները կհայրենադարձվեն, երբ Ադրբեջանն առավելագույնս ներքաղաքական ու արտաքին քաղաքական նպատակներով օգտագործած կլինի նրանց գործոնը․ Սիրանուշ Սահակյան

Պաշտոնապես Ադրբեջանում պահվում է 23 հայ, որոնք չունեն նույնական իրավական կարգավիճակ։ Այս մասին հրավիրված ասուլիսի ժամանակ ասաց ՄԻԵԴ-ում հայ ռազմագերիների շահերի ներկայացուցիչ Սիրանուշ Սահակյանը։

Նա հայտնեց, որ Բաքվում պահվող քաղաքացիների մի մասը զինվորականներ են և որակվում են որպես ռազմագերիներ։

«Ունենք նաև քաղաքացիական գերիներ և նաև Արցախի Հանրապետության նախկին ղեկավարներ, ովքեր իրենց գործունեության և տեսակետների համար են հետապնդվում, ուստի դիտարկվում են որպես քաղբանտարկյալներ։ Այս բոլոր գործընթացներում էական նշանակություն ունի էթնիկ պատկանելիության հատկանիշը»,- ասաց նա՝ հավելելով, որ կան նաև բռնի անհետացման ենթարկված գերիներ։

Սահակյանը նշեց, որ Ադրբեջանը նրանց ներկայացնում է որպես հասարակ հանցագործներ՝ ֆինանսական ահաբեկչություն, զինվորական ապօրինի խմբավորումներ ստեղծելու, զինելու, ապօրինի խոշտանգման, և այլնի համար, և հարցը ներկայացնում է ներպետական կարգավումների կոնտեքստում։

«Մենք չունենք տեղեկություն 2023թ.-ի պատերազմի հետևանքով բռնի անհետացման դեպքերի մասին, բայց շուրջ 80 գործ ունենք դեռևս 44-օրյա պատերազմից, և այստեղ Ադրբեջանն ունի մերժողական քաղաքականություն, որևէ կերպ չի ցանկանում հետաքննության միջոցով բացահայտել դեպքերը և ճշմարտության իրավունքն ապահովել ընտանիքներին»,- ասաց նա և նշեց, որ անհետ կորածների խնդիրը ևս շարունակվում է չլուծված մնալ։

Սահակյանը նշեց, որ շուրջ 210 գերեվարված անձ Ադրբեջանից հայրենադարձվել է։

«Կողմերն ունեն համաձայնություն, որ խնդիրները լուծելուց հետո որպես ածանցվող, երկրորդական հետևանք կհայրենադարձվեն նաև այնտեղ պահվող հայերը։ Կարծում եմ՝ բարձրաստիճան ղեկավարներն ամենավերջում են հայրենադարձվելու և այն պահին, երբ Ադրբեջանն առավելագույնս ներքաղաքական ու արտաքին քաղաքական նպատակներով օգտագործած կլինի նրանց գործոնը»,- նշեց Սահակյանը։