Հայոց բանակին նվիրված բարեգործական համերգը ԱՄՆ-ում առաջինն ու վերջինը եղավ

Արդեն երկրորդ տարին է, որ ԱՄՆ-ում «Գրանդ Փարթի» կազմակերպությունը նախաձեռնում է Հայոց բանակի կազմավորման տարեդարձին նվիրված միջոցառում: Եթե նախորդ տարի այս համերգը լրիվ բարեգործական էր, այսինքն միջոցառմանը մասնակցում էին միայն հրավիրատոմսերով, ապա այս տարի կազմակերպիչները որոշել են փոխել իրենց ուղղվածությունն ու համերգից ստացված հասույթն ուղարկել Հայաստան` ՀՀ զինված ուժերին:

Սակայն այս որոշումն այդպես էլ մնաց միայն որոշում:

«Ալեքս» դահլիճում, որտեղ կազմակերպվել է համերգը, նախատեսվել է ընդունել 750 հանդիսատես: Տոմսերն արժեցել են 50-70 ԱՄՆ դոլար: Կազմակերպչները հույս են ունեցել, որ տոմսերի վաճառքից կստանան 150-200 հազար ԱՄՆ դոլար, որից էլ կհանեն ծախսերն ու մյուս մասը կուղարկեն Հայաստան` հայոց բանակին: Սակայն տոմսերից վաճառվել է միայն 100-ը, իսկ մնացած 650 տեղը կազմակերպիչները լրացրել են արդեն հրավիրատոմսերով:

Newspress.am-ի հետ զրույցում «Grand Party» կազմակերպության նախագահ Արտակ Մարտիրոսյանը խոստովանեց. «երբ հասկացանք, որ նույնիսկ ծախսը չենք հանելու, փորձեցինք հանգանակությամբ գումար հավաքել: 2 արկղ տեղադրեցինք և բոլոր հրավիրատոմսերով մասնակցողներին հորդորեցինք գումարներ նվիրաբերել, որը կուղղվի հայոց բանակին: Սակայն, պատկերացրեք 1000 դոլարից մի քիչ ավել հավաքվեց: Այսինքը` դրանից էլ ոչինչ չստացվեց»,- ասաց Արտակ Մարտիրոսյանը:
Նա կարծիքով` սփյուռքահայերը միայն ֆեյսբուքյան հայրենասերներ են:

«Զինվոր» համակարգող խորհրդի նախագահ Մարգարիտա Խաչատրյանն էլ (մարոզը), ում միջոցով պետք է փոխանցվեր այդ գումարը պաշպանության նախարարությանը, կարծում է, որ «ինչ-որ մարդիկ, ովքեր հիմա Ամերիկայում բարձր պաշտոններ ունեն ու ժամանակին Հայաստանից փախել են, խոչընդոտել էին համերգի կայացմանը»: Թե ովքեր են այդ մարդիկ նա չի մանրամասնել:

Ակնհայտ է, որ այստեղ ինչ որ բան այնպես չէ, քանի որ ո’չ հյուպատոսարանը և ո’չ էլ ԱՄՆ-ում «այդ բարձր պաշտոններ» ունեցողները չեն վստահել «Grand Party»-ի կազմակերպած միջոցառումանը:

Թեև կազմակերպիչները խաղաքարտերը մինչև վերջ չեն բացվում, սակայն պատճառները պարզ են: Մի կողմից շահարկվել է «Զինվոր հայրենյաց» մեդալների հանգամանքը, որոնք, իսկապես «չամիչի նման» բաժանվեցին չգիտես թե ում, կամ ինչի համար: Մյուս կողմից էլ մեր երկրի ղեկավարության նկատմամբ անվստահությունն այնքան մեծ է, որ վերջինիս կողմից «ի պաշտոնե» ուղարկված ուղերձն անգամ միացյալ նահանգներում կեղծ են համարել:

Փաստացի` ԱՄՆ-ի հայության զգալի մասն այն մարդիկ են, ովքեր Հայաստանում ապագա չտեսնելով, ամեն քայլափոխի հանդիպելով երկրի պաշտոնյա այրերի կեղծարարություններին, խաբված ու թալանված` արտագաթել են: Էլ ինչի՞ մասին է խոսքը, էլ ի՞նչ վստահություն…
Ու որքան էլ ցավալի է, սակայն պետք է հաշտվենք այն մտքի հետ, որ հայոց բանակին նվիրված բարեգործական համերգը Միացյալ Նահագներում առաջին և վերջինը եղավ: