ՋԷԿ-ի գույքը օտարում են, իսկ աշխատողներին` թողնում անաշխատանք ու անաշխատավարձ

Մինչ Վանաձոր Քիմպրոմի կազմում գտնվող ՋԷԿ-ի աշխատակիցները պահանջում են դեռեւս 2011թ-ից չվճարված չորս ամիսների աշխատավարձը և վերջնահաշվարկը, ամեն օր սպասելով գործարանի վաճառքի մասին բաղձալի լուրերին նույն գործարանի գույքը մաս-մաս վաճառվում է:

«ՋԷԿը, Քիմպրոմը դրել են աճուրդի, կտրած ծախում են տանում են ավտոներով, հիմի մենք որոշել ենք գանք, փակենք դռները, ոչ մի ավտո բաց չթողենք, մինչև մեր աշխատավարձերի հարցը չլուծեն: Ստեղից մինչև էն էստակադա լրիվ խողովակաշար ա եղել, հիմի մնացել ա ընդամենը մի հատ տեխնիկական ջրի խողովակ, մնացածը տարել են»,- իր վրդովմունքը չէր թաքցնում հսկիչ-տեսուչ Գառնիկ Մարտիրոսյանը:

ՋԷԿ-ի տնօրեն Էդիկ Հունանյանը newspress.am-ի հետ զրույցում չհերքեց, որ ինչպես ՋԷԿ-ի, այնպես էլ Քիմգործարանի կազմի մեջ մտնող ձեռնարկությունների գույքը վաճառվում է: Նրա խոսքով` վաճառքի է դրվում գործարանի հետագա շահագործման համար այլևս ոչ պիտանի գույքը, իսկ որոնք հետագայում կարող են շահագործվել` պահպանվում են:

Փաստորեն ստացվում է, որ ձեռնարկությունը կարող է աշխատել նաև առանց ջրի խողովակների:

Էդիկ Հունանյանը մեզ հետ զրույցում նկատեց, որ դեկտեմբեր-նոյեմբեր ամիսներին պարտքերի մի մասը մարվել է` պայմանով, որ Քիմգործարանի պարտքերը ևս մարվեն վաճառված գույքի գումարով: Էդիկ Հունանյանը, թեև նկատել է, որ վաճառված գույքի հասույթից աշխատավարձերի մարումը առաջնային է, սակայն աշխատողներին դեռևս գումարներ չեն տրամադրվել այդ վաճառքից:
Հատկանշական է նաև, որ չի հրապարակվում նաև, թե ովքեր են այսօր տնօրինում գույքի վաճառքի հետ կապված հարցերը, թեև արդեն գույքը հանվել է աճուրդի:

Հետաքրքիր է, եթե գործարանի գույքի վաճառքն օրիանական է, ապա ինչու արդեն խողովակներով բեռնավորված մեքենան, որը պատրաստվում էր մեկնել, լրագրողներին տեսնելով` հետ իջեցրին բեռնված գույքն ու փախան գործարանի տարածքից, թողնելով նույնիսկ բեռնատար մեքենանաերը: Եւ ինչու գործընթացին ներկա չէր գործարանի տարածքում այդ ամբողջ ընթացքում «ֆրֆռացող» պետը, ով ի պաշտոնե պետք է ներկա լիներ: Ո՞վ է հարստանում ՋԷԿ-ի աշխատակիցների հաշվին եւ ում գրպանն է գնում գործարանի դարպասից մինչեւ ծորակն ընկած խողովակաշարի վաճառքից ստացված գումարները: