Փաշինյանի «յիխիտնի» հարցերն ու ՀՀԿ-ի և ՀՅԴ-ի տոնական տրամադրությունը

Չասեք, թե «յիխիտնի» հարցեր եմ տալիս և փչացնում ՀՀԿ-ի և ՀՅԴ-ի տոնական տրամադրությունը: ԱԺ-ում կառավարության կողմից ներկայացված «ՀՀ կառավարության կառուցվածքի մասին» ՀՀ օրենքում լրացումներ և փոփոխություններ կատարելու մասին նախագիծն առաջին ընթերցմամբ ընդունելու հարցի քննարկման ժամանակ ասաց «Հայ ազգային կոնգրես» խմբակցության պատգամավոր Նիկոլ Փաշինյանը:

Նա հարցադրմամբ դիմեց նախագիծը ներկայացնող արդարադատության նախարար Արփինե Հովհաննիսյանին. ի վերջո ՀՀ-ին տարածքային կառավարման նախարարություն պետք է, թե ոչ:

«Եթե պետք է, ապա ինչպես էինք ապրում այս ամբողջ մեկ տարի երեք ամիսների ընթացում առանց այդ կենսական նշանակության նախարարության, իսկ եթե պետք չի, ապա ինչո՞ւ ենք դա բացում»,- նկատեց Փաշինյանը` հավելելով, թե նշանակում է, որ քաղաքական պայմանավորվածությունը հակասում է կառավարման արդյունավետության տրամաբանությանը:

«Չե՞ք կարծում, որ սա մյուս գործընկերների նկատմամբ խիստ անարդար վերաբերմունք է: Հասկացանք, որ այդ նախարարությունը ժամանակին առանձին են եղել, սակայն եղել է նաև լուսավորության նախարարություն, և կրթության նախարարություն, ինչո՞ւ չեք կիսում նաև այդ նախարարությունները, որպեսզի ձեր հարգարժան գործընկերների նկատմամբ ազնիվ լինեք…»,–ասաց նա:

Նիկոլ Փաշինյանը խնդրեց չքաղաքականացնել իր հարցադրումը, թե արդյոք «դիսկամֆորտի» զգացում չունե՞ն օրինակ պարոն Աշոտյանի և Ճշմարիտյանի նկատմամբ:

Արփինե Հովհաննիսյանն էլ արձագանեց, թե անարդարության զգացում հաճախ ունենում եմ, բայց ոչ այս դահլիճում և ոչ այս հարցը զեկուցելիս: