Մարզահամերգային համալիրը կառավարության ձեռքին թափառաշրջիկ է դարձել

«Կարեն Դեմիրճյանի անվան մարզահամերգային համալիր» ՊՈԱԿ-ի 2016թ.-ի ֆինանսավորումն ապահովելու և պետական գույքի առավել արդյունավետ կառավարման միասնական քաղաքականությունն իրականացնելու նպատակով գործադիրն ընդունել է համապատասխան որոշում: Այս հաղորդագրությունը տեղադրված է կառավարության կայքում, նախօրեին մարզահամերգային համալիրի վաճառքը չեղյալ համարելու որոշում կայացրել է կառավարությունը:

Նշենք, որ կառավարությունն ընդունում է, որ «պետական գույքի առավել արդյունավետ կառավարման միասնական քաղաքականությունն իրականացնելու նպատակով գործադիրն ընդունել է համապատասխան որոշում», նախկին որոշումը, վաճառել գույքը կասկածելի անձին, նշանակում է, որ արդյունավետ կառավարում չէր ստացվել: Գործադիրը անկեղծորեն խոստովանում է, որ սխալ է: Գուցե սա պատահական է, քանի որ դեռևս անհայտ է, թե ինչու հարգարժան կառավարությունը որոշել էր Երևանին լավագույն կառույցներից մեկը վաճառել մի խաբեբայի, իսկ այս ամբողջ գործարքից պարզապես խոշոր պլանի` մանր խաբեբայության հոտ է գալիս, ինչպես Երևանի մնացած շենքերի առք ու վաճառքի, օտարման դեպքում:

Նշենք, որ համալիրը վաճառվել է գնահատվածից ավելի քան երկու անգամ էժան: Կառույցը և հարակից 9.5 հեկտար հողամասը գնահատվել էր 60.7 միլիոն դոլար, վաճառվել` 30 մլն դոլարով, այն էլ հանպատրաստից ստեղծված «ՆՏԱԱ ինվեստմենտ գրուպ» ընկերությանը, և շրջանառվում է Արմեն Զավենի Գևորգյանի անունը, ով բնակվում էր, կամ գրանցված էր Հրաչյա Քոչար 22 շենքում: Վահագ Դինո Ավեդիսյանի անունը ևս շրջանառվում էր գործարքի շրջանակներում, ով ԱՄՆ-ում հետախուզվում էր արժեթղթերի ապօրինի առուվաճառքի համար: Այնպես, որ մարզահամերգային համալիրը վերադարձվեց պետական գույքի կառավարման վարչություն:

Արդեն գաղտնիք չէ, որ խոշոր կառույցների գործարքների ետևում «ատկատներ» են շրջանառվում, իսկ թե այս դեպքում ինչ են կիսել և ինչ չեն կիսել, իմանալ առայժմ գրեթե անհնար է, սակայն այն, որ մշակութային կառույցները, կամ ընդհանրապես ճարտարապետական արժեքները հանուն ոմանց լավ ապրուստի` վաճառում են ում պատահի և ինչպես պատահի, արդեն բազմիցս ապացուցվել է: