Հարսի քողով` փեսուն լավություն... Ավինյանը ձախողեց Մարտի 8–ի իր «շռայլ» նախաձեռնությունը

Մարտի 4-ին, Երևանի քաղաքապետարանի գործակարգավարական նիստի ժամանակ  քաղաքապետ Տիգրան Ավինյանը հայտարարեց, թե` Մարտի 8-ին հանրային տրանսպորտով երթևեկող կանանցից ուղեվարձի գումար չի գանձվելու... 

Նրա այս հայտարարությունն իրականում ծաղր էր կանանց հանդեպ` մի քանի պատճառով։

Նախ և առաջ, ամեն օր տրանսպորտով աշխատանքի գնացող կանանց համար մեկ օրվա համար 100+100 դրամ վճարել–չվճարելը մեծ խնդիր չէ, ու 200 դրամն էլ քաղաքապետարանի կողմից «շռայլ» նվեր չէ։

Մի կողմ թողնենք, որ նախաձեռնությունը ծիծաղելի էր և հարցին կարող էր լինել ավելի օրիգինալ մոտեցում` անդրադառնանք երկրորդ պատճառին։

Քանի որ Մարտի 8–ը ոչ աշխատանքային է, ուստի այդ օրը այնքան էլ մեծ թվով կանայք չեն օգտվում տրանսպորտից ու այս դեպքում էլ «անարդար է»` այդ օրը բոլոր «տանը մնացած» կանանց հանդեպ։ Ստացվում է` կանանց մի մասը քաղաքապետի «շռայլությունից» այդպես էլ չի օգտվելու։

Իհարկե, կան նաև պատճառներ, որի հետևանքով նախաձեռնությունը ոչ միայն կարելի է ծիծաղելի համարել, այլև ձախողված։

Նախ պարզենք, թե ո՞ւմ հաշվին է Երևանի քաղաքապետարանը լավություն անում կանանց։

Հատկանշական է, որ ոչ բոլոր երթուղիներն են գտնվում քաղաքապետարանի վերահսկողության տակ։ Կենցաղային լեզվով ասած` գծատերը որևէ անհատ կամ ընկերություն է։ Հետևաբար վարորդների օրվա աշխատավարձը ստացվոմ է նաև ուղեվարձերից  ու նրանք պատրաստ չեն իրենց աշխատավարձը կիսել կանանց` մանավանդ օտար կանանց հետ։

Այլ բան է, եթե վարորդներին չվճարված գումարների դիմաց քաղաքապետարանն առաջարկեր սիմվոլիկ գումար և հորդորեր կանանցից ուղեվճար չվերցնել։ Բայց քանի որ քաղաքապետը սա չի արել, ուստի որոշ կանայք վարորդներից կշտամբանք են ստացել` չվճարելու համար (կա ահազանգ)։

Սա մի կողմից։  Մյուս կողմից էլ անգամ քաղաքապետարանի ենթակայության տակ գտնվող երթուղիներից է դժգոհություն եղել. այսինքն` վարորդներն ասել են, որ պետք է վճարել։ 

Ու քանի որ վարորդն ստանում է ստաբիլ աշխատավարձ ու ֆիքսված ուղեվարձեր է փոխանցում (կա որոշակի ձևաչափ, որի շրջանակում էլ հաշվարկվել ու սահմանվել է ուղեվարձի չափը), որը, ըստ ամենայնի, պետք է որ «լցվի» Երևանի քաղաքապետարանի բյուջե, ուստի կարելի է եզրակացնել, որ վարորդների կողմից կանանցից ուղեվարձ պահանջելու պատճառը մեկն է` անկախ ամեն ինչից, վարորդից պահանջելու են ֆիքսված ուղեվարձը։

Նշված երկու դեպքում էլ ստացվում է, որ քաղաքապետարանը հարսի քողով փեսուն լավություն է անում....

Իսկ քանի որ այս և նման շատ այլ հարցեր քաղաքապետ Ավինյանը չէր հաշվարկել, ուստի նրա նախաձեռնություը կարելի է համարել ոտքի վրա արված հայտարարություն, որը ձախողվել է։

Արմինե Մկրտումյան