Վերաքննիչ դատարանը որոշում է կայացրել Էջմիածնի համայնքապետի կողմից կատարված նշանակման դեմ՝ հօգուտ Ալվինա Համբարձումյանի

Ավելի քան 2 տարի տևած պայքարից հետո, Վերաքննիչ դատարանը բեկանել է Առաջին ատյանի մերժման որոշումը և որոշում կայացրել Էջմիածնի համայնքապետի կողմից կատարված նշանակման դեմ` հօգուտ Ալվինա Համբարձումյանի։

Դեռևս 2022 թվականի հոկտեմբերին, NEWSPRESS.am-ն անդրադարձել է Վաղարշապատ խոշորացված համայնքի «Կոմիտասի անվան մշակույթի պալատ» ՀՈԱԿ-ի տնօրենի թափուր պաշտոնի համար հայտարարված մրցույթին։ Տնօրենի հավակնորդ էին հանդիսանում նախկին տնօրեն Ալվինա Համբարձումյանն ու նրա տեղակալ Հասմիկ Ադամյանը:

Հիշեցման կարգով նշենք, որ Ալվինա Համբարձումյանն այդ պաշտոնում աշխատել է 7 տարի և ուներ աշխատանքային մեծ փորձ։

Ինչ վերաբերում է Հասմիկ Ադամյանին, ապա նա չի համապատասխանել ՀՈԱԿ-ի կանոնակարգի պահանջներին` մշակույթի ոլորտում չունենալով առնվազն 3 տարվա մասնագիտական փորձ։

Թե՛ Ալվինա Համբարձումյանը, թե՛ Հասմիկ Ադամյանը հավասար միավորներով հաղթահարել էին մրցույթի և՛ գրավոր, և՛ բանավոր փուլը։ Այս պարագայում, սահմանված հայեցակարգով, տնօրենին ընտրում է համայնքի ղեկավարը: Այս դեպքում՝ Վաղարշապատի համայնքապետ Դիանա Գասպարյանը:

Ու չնայած Գասպարյանը պետք է ընտրեր Ալվինա Համբարձումյանին` որպես 7 տարվա փորձ ունեցող ու 3 մասնագիտական դիպլոմ ստացած մասնագետի, սակայն նա ընտրեց ընդամենը 2 տարվա աշխատանքային փորձ ունեցողին (ժամանակավոր պաշտոնակատար եղած ժամանակաշրջանն էլ ներառված)։ 

Քաղաքապետը, ի պատասխան Ալվինա Համբարձումյանի բողոք-դիմումի, արձագանքել է, թե չնայած Հասմիկ Ադամյանը չունի մասնագիտական ստաժ, բայց նշել է, որ նա դասավանդել է նաև անգլերեն ու պետք չէ «ուրանալ» նրա վաստակը:

Թե ինչ կապ ունի օտար լեզուն, այս դեպքում` անգլերենը, մշակույթի հետ, Ալվինա Համբարձումյանը վիճարկել է դատարանում։

Արմավիրի մարզի ընդհանուր իրավասության առաջին ատյանի դատարանը մերժել էր հայցը՝ պատճառաբանությամբ, թե՝ թեև Հասմիկ Ադամյանն օտար լեզվի մասնագետ է, բայց քանի որ «լեզուն մշակույթ է», ապա նա կարող է մասնակցել տնօրենի մրցույթին։

Առաջին ատյանի վճիռն Ալվինա Համբարձումյանը բողոքարկել է Վերաքննիչ դատարանում։

Վերաքննիչ դատարանն իր որոշմամբ, հստակ դիրքորոշում է հայտնել, որ եթե ՀՈԱԿ-ի կանոնադրության մեջ «օտար լեզվի մասնագիտությունը» ներառված չէ` որպես հիմնական զբաղմունքի տեսակ, ապա Հասմիկ Ադամյանը չէր կարող մասնակցել տնօրենի պաշտոնում նշանակվելու համար անցկացվող մրցույթին։

Մի խոսքով` Վերաքննիչ դատարանը, ըստ էության, Ալվինա Համբարձումյանի բողոքը բավարարելով՝ վերոհիշյալ բոլոր վիճարկելի իրավական հարցերին տվել է սպառիչ պատասխաններ։

Ավելին, Դատարանը Վաղարշապատի համայնքապետարանի վրա պարտականություն է դրել հիմնավորել, որ լեզվի մասնագետը՝ օրինակ անգլերենի, փոխկապակցված է մշակույթի հետ, և դա բխում է ՀՈԱԿ-ի կանոնադրությունից։

Ինչպես ավելի ուշ հայտնի դարձավ NEWSPRESS.am-ին՝  ՀՈԱԿ կանոնադրության մեջ նման հիմնավորում չկա։

Այնպես որ, այս գործում, կարելի է ասել, կայացվել է արդար որոշում, և Ալվինա Համբարձումյանն այս փուլում հաղթելով՝ էականորեն բարենպաստ պայման է ստեղծել «Կոմիտասի անվան մշակույթի պալատ» ՀՈԱԿ-ի տնօրենի պաշտոնում հաստատվելու համար։

Արմինե Մկրտումյան