ԱՄՆ-ում Հայոց բանակի օրվա ձախողված դրամահավաքը` «բռնաբարված» հավատի հետևանք

Հունվարի 28-ի Լոս Անջելեսյան համերգի հետ կապված բազմիցս խոսվել է։ Գլենդելաբնակ հայ համայնքի ակտիվիստ Արիս Քարամյանը, ով անձամբ ներկա է գտնվել այդ ձախողված համերգին, Newspress.am-ին ուղարկած իր նամակում մասնավորապես գրել է.

«Փորձեմ պարզապես իմ տեսանկյունից մեկնաբանել, որպես այստեղ ապրող գլենդելահայ ակտիվիստ:
28- ի խորհուրդը մեծ է, ասածս վերամբարձ չթվա, բայց Հայաստանը, նրա անկախության պայքարը, Արցախի վերամիավորումն ու մեր բանակի ստեղծումը իմ ու շատերի համար նվիրական նպատակ է եղել։
Ես դեռ մանուկ էի, երբ մեր ընտանիքը ներգաղթեց Հայաստան, քանի որ այն մեր տունն է, մեր սրբությունը. այս դաստիարակությունն եմ ես ստացել։ Սիրում եմ Հայաստանը անսահման, սիրում եմ ինձ ծնած ու սնած մոր նման, իմ հոգատարության ու խնամքի կարիքը ունեցող զավակիս նման։
Բայց այսօր ինձ թալանված եմ զգում, մի մարդ, ով չկատարեց հոր ցանկությունը, քանի որ նրա նպատակը իր գերդաստանի հաստատումն էր հայրենիքում, իսկ այս պահին միայն նրա շիրիմն է մայր հողում։

Ես այն բազում թալանվածներից մեկն եմ, ով դժվարությամբ ձեռք բերած իր տուն-հայրենիքը թողած գող ու ավազակներին, կյանքի լավագույն տարիները վատնած, ներգաղթածից արտագաղթողի վերածված մի օտարական է դարձել։ Ցավոք, օր օրի մեր թիվն ավելանում է։ Հայաստանի բյուջեն գռփողներն են այսօրվա  արտագաղթի հեղինակները ու այժմյան գաղթօջախի մեծ մասը հենց նրանցից մազապուրծ փախածներն են, որոնք լավ գիտեն,թե ինչ է կատարվում, ցավոք, թալանի երկիր վերածված Հայաստանում։

Թե ինչու Հայոց բանակին նվիրված համերգին Գլենդելում հանգանակություն չհավաքվեց` պատճառը շատ պարզ է: Սփյուռքահայությունը հասկանում է, որ հանգանակած գումարները կգնային ավելի հարստացնելու ժողովրդի արյան ու քրտինքի հաշվին առասպելական միջոցներ դիզած ՀՀ որոշակի պաշտոնյաների։

Այնպես որ, նման «բռնաբարված» հավատով, օրինաչափ էր հունվարի 28-ի ձախողված դրամահավաքը»։

Հիշեցնենք, որ Գլենդել քաղաքի «Ալեքս» դահլիճում հունվարի 28-ին «Գրանդ Փարթի» կազմակերպությունը նախաձեռնել է Հայոց բանակի 24-րդ ամյակին նվիրված բարեգործական համերգ, որից գոյացված միջոցները պետք է ուղարկվեին Հայաստան` ՀՀ զինված ուժերին՝ աջակցելու նպատակով բարեգործական ծրագիր իրականացնելու համար: Համերգի կազմակերպչական ծախսերը կազմել են 30 հազար 250 դոլար: Իսկ համերգի արդյունքում հավաքվել է 15 հազար 625 դոլար: Սա այն դեպքում, երբ համերգի մասնակիցներն անվճար էին ելույթ ունեցել: