Տղես եկավ, ասեց՝ ընտրենք սրան, կարող է՝ լավ լինի․ գիտեի, որ Նիկոլը լավ մարդ չի, բայց տղուս խաթրից դուր չեկա, իսկ հիմա՝ ըհըն․․․ հայրը ցույց տվեց որդու շիրիմը

Գևորգ Վարդանյանը 44-օրյա պատերազմում զոհված զինվորի հայր է։ Նա «Եռաբլուր» զինվորական պանթեոնում մոտեցավ լրագրողներին ու ասաց, որ ուզում է խոսել։

Պատմեց, որ որդին՝ 19-ամյա ժամկետային զինծառայող Գարեգին Վարդանյանը, ով քիչ այն կողմ էր հուղարկավորված, 2018 թվականին հորը խնդրել է ընտրել Նիկոլ Փաշինյանին։

«Իմ տղեն եկավ, ասեց, ընտրենք սրան, կարող է լավ լինի մեր համար։ Ասի` տղես, ես դրան գիտեմ 94 թվականից։ Ասի՝ ինքը լավ մարդ չի․․․ բայց էլ բան չարեցի, երեխուս չուզեցի մանրամասնեմ, թե ինչ առումով լավ մարդ չի, ասի՝ խաթրից դուր չգամ, իսկ հիմա՝ ըհըն․․․»,- ասաց Գևորգ Վարդանյանը՝ ձեռքը պարզելով որդու շիրմի կողմը։

Նա պնդեց, որ Նիկոլին վաղուց գիտի, իսկ վերջին դեպքերից հետո տանը նրա մասին խոսելիս՝ մականուններով են խոսում։

«Աներձագիս հետ նրա համար կռիվ ենք անում, որովհետև մենք տանը նրան «նիկոլոս» ենք ասում, մեծ տղաս էլ ասում է՝ «փաշազադե»»,- ասաց որդեկորույս հայրը։

Նա հիշում է, որ իրենց ասել են, թե ժամկետային զինվորներին պատերազմ չեն ուղարկելու, բայց խաբել են։ Որդին 1 տարի 4 ամիս է ծառայել։ 

«Այդ տարածքը Նիկոլն արդեն տվել էր, ու որդուս էդտեղ են ուղարկած եղել․ խոսքը Հադրութ-Հորադիս շրջանի մասին։ Տարել են ու չեն ասել, որ ծախված հողերն են տանում իրենց»,- ասաց հայրը։