ՀՅԴ-ն որևէ մեկի տակ չի եղել. ՀՀԿ-ՀՅԴ հուշագիրը կստորագրվի հաջորդ շաբաթ (տեսանյութ)

Հայ Յեղափոխական Դաշնակցության հետ համագործակցությունը կամրագրվի հաջորդ շաբաթ, երբ ներկայացվեն առաջարկներ: Այդ մասին այսօր՝ փետրվարի 18-ին ՀՀԿ ԳՄ նիսից հետո ասաց ՀՀԿ մամուլի խոսնակ Էդուարդ Շարմազանովը։

Շարմազանովի խոսքով` ԳՄ նիստում քննարկվել են փաստաթղթի հիմնական կետերը, որոնց վերաբերյալ առաջիկա օրերին կլնինեն առաջարկություններ, իսկ շաբաթվա վերջում կոալիցիայի հուշագիրը կստորագրվի:

Նա համամիտ չէ այն տեսակետին, թե համագործակցության մասին  հուշագրի ստորագրումը ձգձգվում է:

«Դաշնակցության հետ համագործակցությունը զուտ մեխանիկական պաշտոնների բաշխման համագործակցություն չէ: Սա երկարատև ծրագրային համագործակցություն է, որի հիմքում Հայաստանի, Արցախի, հայ ժողովրդի շահն է: Այն ինչ ունի լուրջ նպատակ, չի կարող մեկ-երկու օրում լինել: Դեռ կա ժամանակ»,-ասաց Շարմազանովը:

Մեկնաբանելով ՀԱԿ խմբակցության ղեկավար Լեւոն Զուրաբյանի հայտարարությունները ստեղծվելիք կոալիցիայի եւ ՀՅԴ-ի վերաբերյալ՝ ԱԺ փոխխոսնակն ասաց.

«Սենսացիա չի լինի, եթե ես չհամաձայնեմ ՀԱԿ խմբակցության ղեկավարի հետ, պարզից էլ պարզ է, որ մեր կարծիքները տարբեր են: Կարծում եմ, պարոն Զուրաբյանի մոտ խոսել է իր քաղաքական ուժի ֆիասկոն: ՀՅԴ-ն մեղավոր չէ, որ ՀԱԿ-ը նման անբարենպաստ վիճակում է:

Իսկ Զուրաբյանի այն հայտարարությանը, թե նախագահ Սերժ Սարգսյանի փետրվարի 12-ի ելույթը որևէ կարևորություն չուներ, Շարմազանովը հակադարձեց. «Ոչնչով չեմ կարող օգնել պարոն Զուրաբյանին, եթե նա ոչինչ չի հասկացել: Ինչպես ասվում է Աստվածաշնչում՝ ով աչք ունի թող տեսնի, ով ականջ ունի, թող տեսնի»:

Պատասխանելով newspress.am-ի հարցին և անդրադառնալով այն պնդումներին, որ Սերժ Սարգսյանն ու հանրապետականները ՀՅԴ-ի հետ համագործակցելով Քոչարյանի տակից հանում են ՀՅԴ-ին, Էդուարդ Շարմազանովն ասաց, որ չի ցանկանա կոպիտ արտահայտություն օգտագործել, բայց ՀՅԴ ավելի քան 120 տարվա պատմություն ունի, լուրջ կուսակցություն է և որպես պատմաբան կփաստի, որ դաշնակցությունը պատմության ընթացքում որևէ մեկի տակ չի եղել:

Մանրամասները` տեսանյութում