Զարմանալի է, որ Ներքին Հանդում Ադրբեջանի սադրիչ գործողություններից հետո հակագործողություններ մեր կողմից չեն իրականացվում. Սեյրան Օհանյան

Եթե գրավոր պայմանավորվածություն չկա, ինչի մասին հայտարարեց Փաշինյանը, ապա նշանակում է բարդ իրավիճակում ՀՀ իշխանություններն ասել են, որ ՌԴ սահմանապահ ուժերը կարող են գնալ, այնտեղ տեղակայվել։ Այս մասին ԱԺ ճեպազրույցի ժամանակ հայտարարեց «Հայաստան» խմբակցության ղեկավար Սեյրան Օհանյանը՝ անդրադառնալով հարցին, թե ինչ պայմանագրի հիման վրա են ՌԴ զինված ուժերը գտնվում Ներքին Հանդում։

«Ես զարմանում եմ մի բանի վրա, որ Հայաստանի Հանրապետությունում, փաստորեն, կարելի է նոյեմբերի 9-ից հետո բանավոր հրահանգ տալ և ասել՝ զորքերը հետ քաշեք մինչև ՀՀ սահման, երբ պայմանավորվածություն կար զորքերը կանգնեցնել այնտեղ, որտեղ մարտական գործողություններն ավարտվել են՝ չհասկանալով, որ յուրաքանչյուր այդպիսի հատված կարող է հիմք հանդիսանալ հետագայում սահմանազատման ու սահմանագծման համար՝ բանակցություններում շահավետ դիրք ունենալու համար»,- ասաց Օհանյանը։

Նա նաև զարմանում է, որ ՀՀ իշխանությունները չգիտեն, թե ի՞նչ՝ բանավո՞ր, թե՞ գրավոր պայմանավորվածությունների հիման վրա են ՌԴ սահմանապահները գտնվում այնտեղ։

«Այդ խոսակցությունը սկսվեց այն ժամանակ, երբ ԱԽ քարտուղարը հայտնեց, թե ՌԴ սահմանապահները ոչինչ չեն արել Ներքին Հանդում՝ միջադեպը կանխելու համար և թույլ չեն տվել, որ այնտեղ այցելեն ԵՄ դիտորդները»,- նշեց նա։

Սեյրան Օհանյանը նկատեց, որ ՀՀ սահմանին կանգնած են Ադրբեջանի և ՀՀ ԶՈւ ստորաբաժանումները, որոնց միջև ցանկացած սադրանք կանխելը և համապատասխան միջոցառումներ ձեռնարկելը նրանց գործառույթում է։ Ըստ Օհանյանի` ոչ մի նման գործողություն չի իրականացվել։

«Եթե լիներ՝ մենք 4 զոհ չէինք ունենա»,- ասաց Սեյրան Օհանյանը։

Նա նաև հիշեցրեց, որ ադրբեջանցիներն ապօրինի և սադրիչ գործողություններ իրականացրին՝ անվանելով այն պատժիչ գործողություն, որն ուղղված էր մեր ստորաբաժանումների դեմ։ Սեյրան Օհանյանը զարմանում է, որ այդ «պատժիչ» գործողություններից հետո հակագործողություններ մեր կողմից չեն իրականացվում։

«Ադրբեջանցիները գնալու են սադրանքների մեր սահմանների, մեր ԶՈւ-երի նկատմամբ այնքան, որքան զգան, որ մենք թույլ ենք։ Մեր շահերն առաջ տանելու, ավելի անվտանգ լինելու խաղաղություն պահպանելու այլընտրանքն՝ ուժեղ բանակ և ուժեղ սահմաններ ունենալն է»,- ասաց նա։